WILLEMSTAD – E siudadano di fam Americaan, kende tin 24 aña di edat i ta nasé na Ulanda, dia 6 di yanüari 2026 a mal komportá versus di un trahadó di Reclassering dor di menasá ku un machete den man. Americaan a para ku machete dilanti di un bentana aya na e edifisio situá den Scharlooweg, batiendo ku moketa riba e bentana, gritando: “Morto ta bai kai òf ta kiko boso ke pa mi hasi anto, mata un hende?”.

Pa tal motibu mester tabatin tratamentu di su kaso den sala di korte djarason último, pero e akusado no a presentá, wes mr. M.C.B. Hubben despues di a skucha fiskal a konkluí ku lo para tratamentu di e kaso pa tempu indefiní. Abogado señora mr. Arlene Tromp, meskos ku fiskal a konkluí ku no tin otro rekurso, sino ku mester yama e akusado pa bini padilanti riba un otro fecha.