Haitiano Francois, gran baidó di e kasino i doño di un snèk lo a harma atrako Aqua Casino

WILLEMSTAD – Hinter un dia, kuminsando for di mitar di 10 di mainta te mitar di 8 di anochi a tuma pa trata e kaso di atrako ku armanan di kandela ku a tuma lugá den Aqua Casino den Otrobanda na altura di Pater Euwensweg riba dia 23 di mart 2025. Remarkabel ta ku mesora a surgi rumornan persistente ku lo mester ta trata akí di un ‘inside djòp’, pasobra e orario mainta trempan, na porta kaminda trahadónan so tin pasashi pa drenta e kasino, ta muestra ku tur kos tabata debidamente planiá i ku kada atrakadó tabata bon na altura kon mester aktua.

Riba vidio ku a pasa den sala di korte por a mira 2 outo, 1 S.U.V. koló shinishi skur i 1 otro outo kòrá (Seat Ibiza) ta kore bai bini den serkania di e kasino, orientando algun ratu promé ku e atrako tuma lugá. Despues por a mira imágennan di e atrako mes manera esaki a sosodé, ku e 3 atrakadónan drentando e kasino, ku arma di kandela den man i karanan tapá, poniendo un dama i un kabayero plat abou na suela, habri kluis saka plaka bai kuné.

Tambe a pasa un filmashon kaminda a bai kumpra pòrtofon den e negoshi Señor Barata, ku e atrakadónan aki a uza pa kometé nan akto di ladronisia. Ta trata akí di un suseso hopi violento, poniendo arma di kandela na kurpa di e trahadónan. Esun konsiderá di a hinka e atrako akí den otro, palabrá loke a sosodé ta e hòmber haitiano J. Francois, gran baidó di e kasino, doño di un snèk, anto alabes esun ku a kumpra e outo kòrá (serka un tal Jezus) kual vehíkulo tambe a uza pa tira e atrako.  Segun fiskal señora mr. V. Girigoria-Hernandez, Ministerio Públiko ta sali for di e punto di bista ku por lo ménos 5 persona ta metí den e kaso akí, pero djarason 10 di yüni ku tabatin tratamentu di e kaso, ta solamente 3 akusado tabata presente, kendenan ta 2 persona di orígen dominikano i 1 haitiano. Pa kolmo e 2 dominikanonan ta ruman di otro M. Gonzalez-Cabreja di 45 aña di edat (alias Richard), J. A. Gonzalez di 48 aña di edat, alias ‘Chamo Pistola’ i J. Francois di 52 aña di edat. 

Tres hòmber harmá a kana drenta e kasino, siendo, un di kuater persona tabata warda den e outo kòrá Seat Ibiza.  Shofùr di e vehíkulo aki te ainda no ta konosí. E di 5 siudadano metí den e kaso aki tabata for di prinsipio esun ku tabata tira bista. Segun Ministerio Públiko ta Francois esun ku tabata manehá e outo akí.

E botin ta un suma konsiderabelmente haltu, e ta riba 400.000 florin, tantu den florin komo dòler merikano kontá huntu. Despues di e robo violento aki e atrakadónan a kore den e outo Seat Ibiza, bai for di e sitio, pa despues laga e vehíkulo akí patras na Picadera. Hopi papiamentu tabatin rondo di e komportashon di e akusadonan, esta dispidimentu di plaka pa loko. E haitiano J. Francois direpente a bin ta hunga sumanan grandi di plaka den e mesun kasino aki. E dominikano J.A. Gonzalez a bin ta hunga grandi ku kumpramentu di outo nobo, hasiendo komo sifuera ta BIG SHOT e ta. Gonzalo-Cabreja, esei a biaha bai Santo Domingu. Enfin, tur e komportashonnan straño aki a krea komentario rondó di e hendenan aki.

E atrakadónan tabata komuniká ku otro na spañó i papiamentu. Ademas a tene bon kuenta pa kapa detayenan di postura, koló di kueru i bos, estilo di kana etcetera. Ademas a hasi uzo di imágennan di kámara i telefònnan pa krea un investigashon ku por duna bon resultado. Fiskal a demandá un kastigu di prizòn di 7 aña pa kada atrakadó, kitando e periodo ku a pasa den aresto preventivo. Tambe fiskal a proponé pa bai di akuerdo ku e suma di 2000 di daño i perwisio pa un di e trahadónan. Nòmber di un tal Jason tambe a kai komo un di e sospechosonan ku ainda no a logra pone man riba dje. Tambe fiskal a sigui menshoná kantidat di nòmber di siudadanonan ku a keda interogá. E abogadonan enkargá ku e defensa tabata señora mr. A. Pergault Monte pa e akusado J.A. Gonzalez, mr. R. E. Martis pa e akusado Gonzalez-Cabreja, finalmente pa e akusado J. Fancois abogado mr. U. Dickens.

Wes señora mr. M.C.B. Hubben a keda ku dia 19 di yüni 2026 lo sera e kaso, anto dia 10 di yuli lo dikta sentensia.