Bernardus, kondená pa transportashon di 2960 gram di kokaina

WILLEMSTAD—Djaluna 8 di yüni 2026, tabatin tratamentu di e kaso den sala di korte kaminda e siudadano M. Bernardus a presentá komo akusado den eksportashon di 2960 gram di kokaina. Ta trata akí di un siudadano di 30 aña di edat, kende tabatin abogado mr. M.J. Noor komo abogado defensor.

Tabata 3 di yüli 2024 ku Bernardus a manda un pakete konteniendo droga (kokaina) pa Ulanda. Segun Bernardus tabata un konosí di dje ku yama Gedion, kende a pidié hasi e fabor pa manda e pakete Ulanda i riba e pòst akí tabatin nòmber di Bernardus skibí, komo tal ta esun ku a poné riba pòst. Outomátikamente e responsabilidat pa e akto kastigabel kometé ta pa Bernardus. Segun Bernardus, entre tantu a tira Gedion mata, loke ta hasi imposibel pa outoridatnan averiguá kiko eksaktamente ta bèrdat.

Remarkabel ta ku Bernardus tabata masha skars ku palabra den sala di korte. Bernardus a kontestá wes riba e pregunta dikon, bisando ku e tabatin bon amistat kua Gedion, pero no tabata sa ku esaki tabata den droga. Pero, tantu wes señora mr. van Rijssen komo fiskal mr. K. Hara a opiná ku ta masha straño kon den un periodo ku tin asina problema ku mandamentu di droga pa eksterior via pòst, Bernardus ta tuma un desishon ku tantu riesgo. Bernardus a sigui ninga ku e tabata sa di e droga den e pakete.

Mas aleu segun fiskal, no por konkluí for di e fail ku Bernardus ta komplisé den e akto kastigabel kometé, ounke tòg ta e ta karga responsabilidat pa loke a pasa. Fiskal a opiná ku Bernardus mester bai será i asina ei a demandá un kastigu di prizòn di 18 luna di kua 6 luna kondishonal mas un periodo di prueba di 2 aña. E demanda akí ta suavisá, kompará ku loke normalmente sa pidi na kastigu (sa ta 21 luna di prizòn, sin kondishon), pero komo ku tin kasi 2 aña ku e suseso a tuma lugá, e demanda ku fiskal a hasi ta ménos.  Pero wes mr. van Rijssen a dikta e kondena di 18 luna kastigu di prizòn di kua 8 luna kondishonal, mará un periodo di prueba di 2 aña. Ke men, ounke Bernardus ta kai será, el a sali bastante bon for di e asuntu.

Segun Emerenciana ta Juan Camillo a pon’é kai será ku droga

WILLEMSTAD—Otro siudadano ku djaluna 8 di yüni 2026 a insistí ku ta un empresario kolombiano a gañé i pone ku el a kai den man di hustisia pa pasamentu ku droga ta G. Emerenciana di 35 aña di edat. Segun Emerenciana, kende a presentá ku abogado mr. Zahedi pa su defensa, tabata dia 27 di yanüari 2023 ku el a aserká un empresario ku yama Juan Camillo pa trabou i tabata na un momento ku debidamente e tabatin mester di plaka. E tabata ke djis un djòp pa gana algu pa por mantené su mes. Juan  Camillo a bisé ku loke e por ofresé ta pa hasié un fabor di pone un pakete riba pòst.

Na su turno Emerenciana a kontrolá e pakete ku tabata ‘doorzichtig’ di manera ku e no a mira nada robes. Pero despues ku el a pone e pakete riba pòst, outoridatnan a konstatá ku esaki tabata kontené 3044 gram di kokaina, komo tal el a bin kai den detenshon pa algun dia. Wes señora mr. van Rijssen i fiskal señora mr. K. Hara a hasi bastante pregunta na e akusado Emerenciana, kende a deklará ku e tabatin sierto duda na momento ku Juan Camillo a dun’é e djòp, pero despues ku el a kontrolá e pakete i no ripará nada robes, el a disidí di dal bai numa. Fiskal señora mr. K. Hara a trese padilanti ku serka outoridatnan Emerenciana na promé instante a ninga ku tabata su ‘handschrift’ loke tabatin riba e pakete, pero a lag’é mira ku debidamente tur e informashonnan personal ta kuadra ku esun di dje. Segun Emerenciana, e hòmber Juan Camillo a gañé ku ta arte tabatin den e pakete. A hasi komo sifuera e kontenido di e pakete tabatin un balor di 800 florin, pero pa mandé afó, e gastunan a keda stipulá na 900 florin.  E pakete tabata destiná pa Hong Kong i apart di e droga tabatin un opheto di aluminio, esta klaramente un obra di arte.

Segun Emerenciana debidamente el a duna outoridatnan e direkshon di Juan Camillo, pero nan a tarda demasiado ku e investigashon di manera ku kosnan a bai robes ku no a logra gara e kolombiano Juan Camillo. Mas aleu Emerenciana a sigui splika ku despues ku el a sali fo’i prizòn dia 6 di febrüari 2023, mesora el a haña un trabou pa hasi. Enfin, Emerenciana su bida a normalisá entre tantu. Fiskal a rekonosé ku e kaso ta unu bastante bieu, esta for di yanüari 2023, komo tal lo tene kuenta. Ademas Emerenciana ta un firstoffender. Normalmente e kastigu lo mester tabata 24 luna di prizòn sin mas, pero debí ku añanan a transkurí fiskal a pensa ku un demanda di 200 ora di kastigu di trabou, mará na 12 luna kastigu di trabou kondishonal ku un periodo di prueba di 2 aña, ta presis loke wes mr. van Rijssen a bai di akuerdo kuné komo kastigu pa Emerenciana. Pero ta enserá sí ku Emerenciana no kumpli ku e kastigu di trabou, e ta bai será pa un periodo di 100 dia.