Gobièrnu di Jamaica ta rechasá sugerensianan tokante bishita di USS Nimitz

KINGSTON, JAMAICA – Di forma drástiko e gobièrnu di Jamaica a rechasá tur insinuashon ku e bishita di e porta-avion merikano USS Nimitz siman pasá tabata relashoná ku posibel akshonnan militar merikano kontra Cuba. E gobièrnu a enfatisá ku e bishita na e haf tabata un bishita di rutina i di bon boluntat ku ta reflehá e relashonnan bilateral fuerte entre Kingston i Washington.

Mei mei di un debate públiko ku ta kresiendo, e minister di Asuntunan Eksterior di Jamaica, Kamina Johnson Smith, a deklará ku e bishita di sinku dia tabata parti di un programa di koperashon marítimo i di diplomasia, i no un demostrashon di poder militar dirigí kontra gobièrnu di Cuba.

USS Nimitz, un di e porta-avionnan di mas grandi na mundu, a yega Jamaica siman pasá komo parti di un gira regional ku ta inkluí Surnam, Guyana, Trinidad i Tobago i Grenada. Ta spera ku e barku lo sali for di servisio pronto despues di dékadanan di servisio for di su introdukshon den añanan 70.

Johnson Smith a argumentá ku alegashonnan di intimidashon militar no ta kuadra ku e naturalesa di e bishita, ku a inkluí aktividatnan komunitario, proyektonan pa mehorá skolnan, eventonan deportivo i interkambionan kultural.

“Esaki ta un bishita planifiká den kuadro di un programa eksistente di koperashon marítimo i bon boluntat,” el a bisa, agregando ku histórikamente Merka a bira transparente tokante su proyekshon di poder militar.

Su komentarionan a bini komo reakshon riba krítikanan di varios observadónan regional, inkluyendo eks subsekretario-general asistente di CARICOM, Byron Blake, kende a sugerí ku e presensia di e porta-avion pegá ku Cuba mester keda interpretá den e konteksto di tenshonnan ku ta oumentando entre Washington i Havana.

Blake a argumentá ku por interpretá e presensia di e barku na Jamaica komo un sosten indirekto pa futuro akshonnan merikano kontra Cuba, i a puntra si e aktividatnan komunitario publiká realmente ta reflehá e meta stratégiko mas amplio di e mishon.

Preokupashonnan similar a keda ekspresá pa Neville Bissember, profesor di derecho na Universidat di Guyana, kende a bisa ku e demostrashon di trupanan por keda bou di investigashon severo pa motibu di e serkania di Jamaica ku Cuba. El a señalá ku derecho internashonal generalmente ta deskurashá terser paisnan di duna sosten material ku por fasilitá un akshon militar kontra otro estado.

Sinembargo, outoridatnan Jamaikano ta sigui insistí ku un situashon asina no ta eksistí i ku e bishita mester keda konsiderá komo parti di e koperashon diplomátiko i militar normal entre dos sosio ku ta mantené relashon pa hopi tempu kaba.

Embahada di Merka a deklará ku e bishita a inkluí interkambionan profeshonal ku miembronan di e forsanan armá di Jamaica, reunionnan ku funshonarionan gubernamental i studiantenan, i tambe inisiativanan di servisio komunitario. E bishita tabata tambe parti di e mishon Southern Seas 2026 di Marina di Merka, un programa regional kontinuo orientá riba fortifiká aliansanan i promoviendo metanan kompartí di seguridat den hinter region Karibense.