WILLEMSTAD – Dos hende muhé di fam Garcia-Valencia (31 aña di edat) i Flores (67 aña di edat) tabata den sala di korte djabièrnè 5 di yüni 2026. Garcia-Valencia ta di Colombia, siendo Flores a nase na Kòrsou. E duo aki a presentá den sala di korte pa un kaso dirigí pa wes mr. W. Foppen. E dosnan akí ta akusá di falsifikashon di dokumento i transportashon di hende.

Segun tratamentu di e kaso tabata andando por a saka afó ku Flores ta un persona di bon reputashon ku a traha den gobièrnu, pero ku últimamente ta metí den reglamentu di pèrmit di estadia i trabou pa strañeronan. Asina ei el a yega di atendé hopi asuntu pa trahadónan di e prestigioso empresa ulandes Heineken. Garcia-Valencia ta di desendensia Kolombiano, kende su famia ta doño di garashi. Via Carcia-Valencia a bini den kontakto ku Flores pa regla pèrmit di estadia pa un kolombiano di fam Balanta Ulabarez ku tabata traha den garashi di famia Garcia-Valencia.

Reglamentu di pèrmit, hopi biaha ta sosodé a base di dokumentunan falsu, pa kua mester paga sumanan kuantioso di plaka. Asina ei a sosodé tambe den e kaso akí ku e persona mester a paga pa regla un permit falsu durante e periodo di 1 di yanüari 2024 pa 31 di ougùstùs 2024, sumanan di Cg 1500,–, Cg 1600,– Cg 2000,– i Cg 2500,– ku mester a keda entregá ‘kesh’ na Flores, kende finalmente tabata atendé ku un tal Zimmerman.

Outoridatnan di migrashon na sierto momento a deskubrí ku e dokumentonan ku e kolombiano Balanta-Ulabarez tabata hasi uzo di dje tabata falsifiká i asina ei a gara Balanta-Ulabarez te ku el a kai será i keda kondená. Pero, awor a toka turno na esnan envolví den e falsifikashon, esta Garcia-Valencia i Flores. Den sala di korte ámbos persona tabata sumamente emoshoná i no a skapa di deramá lagrima. Enkarselashon a kai ámbos persona di un forma sumamente doloroso. Pero, komo ku Flores su papel i òf responsabilidat den e kaso akí tabata mas grandi, su periodo den prizòn lógikamente tabata mas largu. Aparentemente Flores ta hopi metí den e tipo di asuntunan akí, esaki por a saka afó for di investigashonnan ku a tuma lugá riba su telefòn. Sin a bai muchu den detaye, fiskal señora mr. K. Hara a indiká ku tin un rei largu di nòmbernan ku Flores lo tabatin di haber kuné pa regla pèrmit. Pues no ta nada straño ku tratamentu di e kaso a konsentrá práktikamante rondó di Flores solamente. Kasi tur pregunta di tantu wes komo fiskal tabata pa Flores kontestá. E akusado Flores a pasa 81 dia den prizòn, siendo Garcia-Valencia a konosé no mas ku 30 dia di enkarselashon. Un punto importante na fabor di ámbos akusado ta ku ningun di nan dos no tin un pasado ku hustisia.

Remarkabel ta ku ámbos akusado a splika ku nan kier a yuda un persona, den e kaso akí Balanta-Ulabarez, pero a kana kamindanan robes. Fiskal señora mr. Hara, den e sentido akí a sigui konfrontá e akusadonan ku e realidat akí, mustrando ku no tin motibu pa buska manera di burla di lei i òf proseduranan establesé i ku ta vigente den tur pais.

Pa Flores fiskal a demandá un kastigu di prizòn di 100 dia di kua 19 kondishonal, kitando e 81 dianan ku e tabata den aresto preventivo. Pa Garcia-Valencia fiskal a demandá un kastigu di prizòn di 60 dia di kua 38 kondishonal. E kastigunan ta mará na un periodo di prueba di 3 aña.  Wes mr. Foppen a preferá pa tuma tempu pa studia e kaso kompletu promé ku dikta sentensia. E wes a keda ku dia 26 di yüni 2026 lo e dikta sentensia.