Kòrsou meresé un atenshon urgente: retonan sosial-ekonómiko ku ta pidi akshon konhunto

Sifranan ofisial ta mustra ku alrededor di 40% di nos poblashon ta biba na rant òf bou di liña di pobresa. T’esaki nos ke? E oumento kontinuo di preis di produktonan básiko den supermerkado ta pone ku kada dia ta bira mas difísil pa famianan kubri nan nesesidatnan di tur dia. Esaki no ta sostenibel.

Un gran parti di nos hendenan grandi ta dependé únikamente di AOV, ku no ta yega pa kubri kosto di bida aktual. Alabes, e entrada mas komun na Kòrsou ta sueldo mínimo, ku lamentablemente ta keda bou di loke ta definí komo -mínimo pa biba-. E kombinashon akí ta pone hopi kas bou di preshon finansiero konstante.

Akseso na tereno pa konstruí kas, kuminsá negoshi òf pa rekreo ta keda un reto pa e siudadano lokal. Proseduranan ta kompliká i tin persepshon ku invershonista eksterno ta haña mas fasilidat. Ta importante pa maneho di tereno reflehá e prioridat pa duna nos propio hendenan oportunidat real pa progresá.

Nos ta enfrentá dos tendensia demográfiko ku mester atendé: enbehesementu di poblashon di un banda i salida di hubentut pa eksterior di e otro banda. E desaroyo akí ta influensiá nos forsa laboral, nos kultura i e sostenibilidat di nos sistemanan sosial. Alabes, integrashon di komunidatnan nobo ta rekerí atenshon pa garantisá ku nos idioma, kustumber i balornan ta keda biba, miéntras nos aktualmente, sin para ketu, ta habri pa diversidat.

Sistema di enseñansa mester keda reforsá pa e prepará nos hóbennan mihó pa e realidat ekonómiko aktual. Un forsa laboral bon prepará ta klave pa atraé invershon di kalidat i pa subi produktividat nashonal.

Institushonnan sivil mester bolbe tuma nan ròl vital. Sindikalismo, komo bos di trahadó, tin espasio pa bolbe krea balansa den relashonnan laboral. Prensa liber tin un responsabilidat grandi pa investigá i informá ku kurashi i ophetividat, ounke nos komunidat ta chikitu i relashonnan ta serka. Transparensia ta fortalesé demokrasia.

Ta esensial ku nos representantenan den Parlamento i den otro institutonan haltu tin e preparashon, independensia i sosten pa tuma desishon den interes general. Konfiansa di pueblo den Ministerio Públiko i otro órganonan di hustisia ta fundamental pa estado di derecho. E konfiansa ei mester keda kultivá ku akshon transparente i konsistente.

Kon nos ta sigui?

E retonan menshoná ta serio, pero nan no ta imposibel. Nos ta puntra si lo por introdusí kambionan asina fundamental i profundo sin un revolushon, esta ku un renobashon: un esfuerso nashonal kaminda gobièrnu, sektor privá, sindikato, enseñansa, prensa i siudadano ta sinta huntu pa:

Revishon di poder di kompra: Evaluá AOV, sueldo mínimo i kosto di bida ku dato aktual.
Simplifikashon di prosedura: Hasi akseso na tereno i pèrmit mas transparente i ágil pa lokalnan.
Invershon den hóben: Programa konkreto pa retené talento i krea oportunidat akí mes.
Fortifikashon institushonal: Kapasitashon i responsabilisashon pa esnan ku ta sirbi pueblo.
Diálogo nashonal: Un plataforma kaminda tur bos ta ser skuchá sin miedu pa represaya.

Kòrsou tin e hende, e talento i e resilensia pa superá e fase akí? Kòrda ku e ta eksigí kurashi pa rekonosé e problemanan, humildat pa traha huntu, i determinashon pa ehekutá. Ta tempu pa pone interes di pueblo sentral atrobe.

Erwin Raphaëla