Vários bario a pèrdè koriente djasabra pasá

WILLEMSTAD.- Aqualectra a duna splikashon di e situashon ku a surgi djasabra 25 di aprel ku a pone ku varios área di Korsou a keda sin koriente, te ku a kuminsá schakel entre barionan.

Pa motibu di e interupshon aki, a skohe pa schakel koriente entre diferente bario entre 7’or pa 12or di di anochi. Esaki, pa evitá ku algun bario òf área ta keda sin koriente muchu largu, pero tambe pa protehá e sistema i evitá ku e interupshon lo a bira un problema muchu mas grandi.

E motibu di e interupshon tabata un kombinashon di diferente faktor, asina Aqualectra ta splika. Durante e último dianan, tabatin tres mashin for di servisio pa por hasi algun reparashon i trabounan di mantenshon nesesario. Tanten ku e mashinnan aki tabata afó, e sistema di almasenahe di energia pa medio di bateria (BESS) a yuda sostené demanda di Kòrsou, huntu ku e produkshon regular, sin ku e klientenan mester a sinti muchu molèster. Sinembargo, djasabra ultimo bientu a baha por kompletu durante henter dia, poniendo ku e produkshon di e mulinanan tabata hopi abou.

Esaki huntu ku e tres mashinnan ku tabata den reparashon a pone ku no por a karga e baterianan pa por pasa e demanda di anochi. Miéntras Aqualectra a premirá esaki siguiendo pronóstikonan di tempu, a kalkulá tambe ku un di e tres mashinnan ku ta den reparashon ya lo tabata den servisio bek di moda ku por a kumpli ku demanda sin ningun problema; ku e mashinnan huntu ku BESS. Sinembargo e mashin ku nan a kalkulá ku lo mester tabata bèk den servisio no tabata kla ainda, lokual a pone un peso èkstra riba BESS i e otro mashinnan den produkshon. Pues netamente pa evitá ku esaki lo a kousa un problema mas grandi, a skohe pa bai over na schakel durante e oranan di djasabra anochi kaminda demanda di koriente tabata mas haltu riba nos isla i mantené un balanse. Entretantu e situashon a normalisá.