WILLEMSTAD – Un siudadano di fam Nicholson, kende tin 33 aña di edat tabata den sala di korte, djabièrnè 24 di aprel, akusá di poseshon di arma di kandela. A gara Nicholson ku e arma di kandela dia 29 di yanüari 2026 na su kas  den e bario di Santa Maria. Den e kaso aki tambe abogado mr. Zahedi ta okupá ku e defensa. Ta trata aki di 1 pistol Pietro Barreta, kaliber 9 x 19. E akusado a trese padilanti ku e motibu ku e tin e arma di kandela ta pasobra e ta un ‘rapper’ i ta pa por si akaso e hañ’é tin di defendé su mes. ‘Rapper’-nan sa haña nan mes konfrontá direpente ku problema, pasobra loke nan sa kanta sa krea konflikto, segun e akusado. E akusado Nicholson a splika wes ku ta solamente 1 siman e tin e arma di kandela, p’esei a zona hopi straño ku e akusado a remarká ku su ruman sa papia kuné pa no kana ku arma di kandela. Aki e akusado, reakshonando riba wes,  a trese padilanti ku el a yega di papia ku su ruman ku e tin idea di buska 1 arma di kandela i ta pa tal motibu su ruman a papia kuné, bisando pa e no buska ningun arma di kandela.

Abogado mr. Zahedi a mustra ku hopi énfasis ku 1 arma di kandela ku haña sea na kas òf den kurá di un kas en prinsipio no ta forma un peliger pa públiko, pasobra ta ora ku e persona tin e arma di kandela konstantemente huntu kuné, sea den su outo òf direktamente na su kurpa e peliger ta grandi, pasobra por hasi uzo dirèkt di e arma di kandela. Otro ta sigur si ta na enkuentronan públiko tin e arma di kandela, pasobra ta ei e peliger mas grandi ta sinta. E último aki no ta e kaso ku su kliente Nicholson, pasobra aki e tabata mas bien den seno di famia i amigunan. Otro punto importante den e kaso di Nicholson ta ku e no tin pasado ku hustisia. Pues ta trata aki di un ‘firstoffender’, ku a koperá masha bon mes ku hustisia, durante e investigashon, segun e abogado. Ademas Nicholson a konosé un situashon di índole familiar masha ferfelu mes ku su yu na Ulanda ku kende e no tin kontakto pa basta tempu. Reclassering tambe a duna e rekomendashon pa konsentrá mas tantu posibel riba dunamentu di guia profeshonal na e akusado. Wes finalmente despues di a skucha tantu fiskal, e abogado komo e último palabranan di e akusado Nicholson a yega na e sentensia di 20 luna kastigu di prizòn di kua 8 luna kondishonal, mará un periodo di prueba di 3 aña i guia profeshonal di Reclassering. Ta laga saka e arma di kandela for di sirkulashon.

.