COLOMBIA – Alkalde di Cali, Alejandro Eder ta hasi apelashon serio na presidente di e pais Petro pa atende ku e ola terorista ku a lanta kabes. E atentadonan lo ta bou di mando di e grupo FARC. Ta indikando ku e krisis di seguridat a bira pio ya ku ta varios atentando ku bòm tabatin. E kantidat di morto despues di e atake di djasabra ultimo riba un kaminda importante den zùitwèst di Colombia, a yega 19.

Por lo ménos 19 persona a pèrdè nan bida den e atentado ei. Ta falta algu mas ku un luna pa e elekshonnan presidensial. Mei mei di e kampaña elektoral, dominá pa e tema di seguridat, outoridatnan a atribuí e atake na disidentenan di e eks gueria FARC ku no a aseptá e akuerdo di pas di 2016. Presidente Gustavo Petro a referí na nan komo “teroristanan” i a ordená pa alsa persekushon.

Den un informe publiká riba X, Medicina Legal a informá di “diesnuebe kurpa sin bida”. Promé ku esaki, nan a indiká ku e sifra tabata 14 morto i 38 herido komo konsekuensia di e eksploshon grandi ku a pasa djasabra 25 di aprel riba un kaminda den e departamento di Cauca. Segun e ehérsito, e eksploshon a sosodé durante di un kontròl ilegal di e disidentenan kontra poblashon sivil riba kaya.

E bòm a pega kontra mas di dies vehíkulo i a benta nan vários meter, segun testigunan di e atentado. Imágennan ta mustra e kurpanan kubrí di otro víktimanan, vehíkulonan destruí i un krater grandi riba e kaminda. E rebeldenan ta sembrá teror den e region di Cauca, ku un serie di atentado ku a kuminsá djabièrnè ku un atake ku bòm kontra un base militar den e siudat di Cali, ku a laga dos herido. E krísis di seguridat na Colombia ta empeorá despues di un atake nobo ku silinder di bòm den e zùitwèst di e pais. E grupo liderá pa Iván Mordisco, e kriminal mas buská di Colombia, ta kastigá e pueblo  ku eksplosivonan, dron i tiroteo.

Despues di su yegada na poder na 2022, presidente Petro a trata sin éksito pa negoshá pas ku e organisashonnan armá mas grandi, ku a fortalesé nan organisashonnan den e último añanan.