WILLEMSTAD— Djarason 29 di yüli 2026 tabatin tratamentu di e kaso di un siudadano di fam Curiel, kende tin 16 aña di edat, pero ta keda akusá di destrukshon i komportashon sumamente violento na G.O.G.. Tabata dia 4 di yüni 2026 ku Curiel a bati un empleado di e instituto JJIC (konosí komo GOG) ku bate di beisbòl den kabes, na kara i otro partinan di e víktima aki su kurpa, komo tal Curiel a keda akusá di maltrato, anto tambe destrukshon di vehíkulonan ku ta pertenesé na trahadónan di e instituto i tambe bentananan di e ofisina di J.J.I.C. a keda destruí.

Pero dia 27 di mart 2026 tambe Curiel a menasá un otro siudadano. Ademas tin e akusashon kontra di Curiel pa loke ta trata su komportashon violento dia 6 di yanüari 2025 den Kaya John de Pool. Aki tabatin 2 otro siudadano ku a bira su víktima. Curiel a tira e siudadanonan en kuestion ku baranka di piedra. Na e okashon aki a konstatá ku e akusado Curiel tabatin den su poder 1 bate di beisbòl, machete i algun hèrmènt ku e tabata kapas pa uza kontra di e siudadanonan ku kende e tabatin problema. Ta parse ku na sierto momento Curiel a gara un di e siudadanonan na garganta i batié, anto tambe zuai ku bate di beisbòl riba e otro siudadano, kousando fraktura na man i pia.

Ta nesesario remarká ku e suseso aki a bini ampliamente den publisidat na Kòrsou, ya ku hasta Minister di Hustisia a intervení, pasobra e sirkunstansia den GOG a kue un buèlta di hopi prekupashon, lantando konmoshon den pueblo. Klaramente e instituto a bin kai den un lus sumamente negativo i di inseguridat pa trahadónan.

Tratamentu di e kaso públiko bou di guia di wes señora mr. J.C.A.M Los a tuma kasi hinter mainta, pasobra wes a konfrontá e akusado Curiel ku práktikamente kada detaye di e akusashonnan kontra dje, mas e deklarashonnan di ekspertonan ofisial manera sikiater i sikólogo. Durante tratamentu di e kaso tabatin un di e profeshonalnan (sea ta sikiater òf sikólogo) presente. Klaramente a bini padilanti ku Curiel a krea un esfera i situashon sumamente negativo den e instituto di akuerdo ku fiskal señora mr. T. Keller.

Pa su defensa den sala di korte e akusado tabatin abogado señora A.M. Tromp, kende a konsentrá en ekstenso riba argumentunan pa suavisá e akusashonnan kontra di su kliente ya ku ta trata aki di un menor di edat. Segun abogado señora Tromp, den e kaso di su kliente, mester wak tambe aspektonan pedagógiko, esta e edukashon di e hóben i e esfera ku el a lanta kuné den kas, entre otro influensia di tata riba yu. Komo tal a hasi investigashon riba e forma di komportá di Curiel. Natural e abogado a referí na resultado di e rapòrtnan ku a subi mesa. Mas aleu abogado señora mr. Tromp a añadí e hecho ku su kliente a rekonosé kulpabilidat di su parti. Maske tantu wes mr. Los komo fiskal mr. Keller a para duru i di forma intensivo na e mal komportashon di Curiel, abogado mr. Tromp a sigui mustra ku ta momento pa kana un ruta nobo pa evitá ku susesonan lamentabel lo ripití. Ke men lo mester di guia profeshonal i un kastigu ku ta kuadra. Klaramente a konstatá serka Curiel síntomanan di un komportashon kognitivo limitá (bou di promedio), pues un nivel di inteligensia bastante abou. Sikiater i sikólogo a konkluí ku Curiel ta ménos responsabel pa su aktonan. Positivo ta e hecho ku for di e momento ku a skòrs detenshon di Curiel for di aresto preventivo, por a nota kambionan satisfaktorio, pasobra e siudadano aki ta tene su mes na palabrashonnan i ta koperá ku e guia ku e ta risibí di Reclassering Hubenil.

Abogado mr. Tromp

Ta bai atendé e siudadano aki a base di intervenshonnan ménos stringente, kompará ku e manera ku djis despues di su detenshon tabata sosodé. Fiskal señora mr. Keller deliberadamente a dirigí su mes na e akusado Curiel, hasiendo e pregunta si e akusado aki ta komprondé loke ta pasando. “Rèspèt un hende ta gana solamente dor di duna rèspèt promé!”, e fiskal a bisa ku énfasis. Finalmente fiskal a demandá un kastigu di 24 dia hubenil, kitando e periodo ku Curiel a pasa kaba den aresto preventivo, mará na un periodo di prueba di 3 aña. Ta nifiká ku Curiel lo no tin kastigu pa sinta por lo pronto, pero sí ‘banchi’ te 31 di yanüari 2027, mas 100 ora di trabou di obligatorio, training i guia spesial di Reclassering. Tur esaki di akuerdo ku e sentensia di wes señora mr. Los