Sosten di CAP I CAH na Siloam i muchanan Banda Bou

WILLEMSTAD— Pa hopi aña kaba, Stichting Siloam ta un fuente di kuido i sosten pa mucha, famia i individuonan na Soto i komunidatnan den bisindario. Pa medio di su esfuersonan kontinuo, e fundashon a yuda kubri nesesidatnan diario, dor di brinda kuminda, pakete di produktonan di alimentashon, material di skol i otro sosten esensial na esnan ku tin mas mester di dje.

Entre esnan ku Stichting Siloam ta sostené pa añanan kaba tin 125 mucha di Soto i komunidatnan den bisindario. E aña akí, Curaçao Airport Partners (CAP) i Curaçao Airport Holding (CAH) ke hasi algu speshal tantu pa e muchanan komo pa e organisashon ku kontinuamente ta kuida nan.

Djamars 18 di ougùstùs 2026, CAP i CAH a tuma riba nan, e organisashon i gastunan di e inisiativa anual Back-to-School di Stichting Siloam. Di e manera aki, nan a brinda e fundashon i su boluntarionan dediká, un momento di sosten meresí i alabes  krea un komienso inolvidabel di aña eskolar nobo, pa e 125 muchanan ku Stichting Siloam ta sirbi. E aktividat, ku a tuma lugá na Landhuis Pannekoek.

Kada mucha a bai kas ku artíkulonan práktiko i esensial pa prepará nan mes pa e aña eskolar nobo. Kada mucha a haña oportunidat di skohe su mes tas di skol, huntu ku material di skol i otro artíkulonan nesesario di nan preferensia, for di un variedat di opshon disponibel. Nan a risibí tambe mea i un faha. Komo sorpresa adishonal, kada mucha a risibí un ‘voucher’ di XCG 100 pa nan por skohe un par di kèts.

CAP i CAH a presentá e fundashon tambe ku un kontribushon finansiero di XCG 30.000. E aporte finansiero akí lo yuda Stichting Siloam sigui ku su trabou bunita i importante pa e muchanan, famianan i individuonan ku ta dependé di su kuido i sosten.