Pa kuminsá e siudadano di fam Nicolaas, kende tin 26 aña di edat, a keda gará ku 1 pistol di e marka FEG, modelo Mark II AP, kaliber .380 outomátiko i e munishon korespondiente. E pistol ariba menshoná, segun polisnan, tabata kargá ku 4 patronchi. 

E violashon di arma di kandela akí a sali na kla na momento ku un patruya di polis, koriendo den outo riba kaminda públiko, patras di un otro vehíkulo, a mira un persona, komportando hopi straño, kende na sierto momento hasta a saka man pafó di e vehíkulo i benta un opheto koló skur riba suela pafó di e vehíkulo. Tambe un tas koló blanku (1 tas pa skouder), Nicolaas lo mester a purba deshasí di dje. 

Wes señora mr. van Rijssen durante tratamentu di e kaso akí a splika ku polisnan a añadí un prosèsverbal mas den kua ta duna un deskripshon muchu mas amplio i eksakto di loke a sosodé. Parse ku e outo di polis, koriendo patras di e vehíkulo den kua e akusado Nicolaas tabata sintá, tabata kada biaha bastante serka di e outo di Nicolaas, variando di e distansia di entre 3 pa 5 meter. E suseso aki a tuma lugá dia 13 di desèmber 2025 i e patruya di polis mesora a bai mira na e sitio kaminda Nicolaas lo mester a benta e opheto skur pafó di e outo, pa konstatá ku ta trata aki di un pistol bon kargá. Pero, e akusado Nicolaas for di e dia ku polisnan a garé a deklará ku ningun momento só e no a benta ningun arma di kandela for di outo. Sí el a rekonosé ku e tabatin hash huntu kuné i e no tabata ke pa polisnan hañé ku e droga. E siudadano Nicolaas mas aleu a reklamá ku polisnan, na momento ku a aresté, a maltraté pisá di manera ku a surgi vários leshon na su kurpa. Polisnan, segun e akusado, a dal e wanta i moketa, miéntras e tabata abou na suela. Polisnan na nan turno a deklará ku Nicolaas a duna resistensia, e no kier a koperá na momento ku a start ku e investigashon riba dje. Parse ku Nicolaas a zuai ku mannan den laira. 

Polisnan a listra Nicolaas i riba telefòn di e akusado akí a bin haña pòtrèt di e arma di kandela plùs 1 tas blanku pa skouder ku mester ta pertenesé na Nicolaas. Fiskal señora mr K. Hara a hasi hopi pregunta na Nicolaas, kende a rekonosé mesora di a faya di no a koperá ku polis, pero esei tin di haber ku e no tabata ke pa hañé ku hash i tambe e hecho ku ya tabata hopi serka di dianan di fiesta, Pasku i Aña Nobo. Abogado mr. John Loth a hiba palabra na nòmber di e akusado Nicolaas i a ekspresá duda ku durante oranan di anochi polisnan realmente por a mira e opheto asina bon. Ademas segun abogado mr. Loth no ta riba kaya sino den kurá di un kas a haña e arma di kandela bentá, pues segun e abogado mester a hasi un tèst di DNA pa determiná ku enbèrdat ta arma di kandela ku a pertenesé na Nicolaas, pero lamentablemente no tabatin ningun tèst di DNA hasí.