WILLEMSTAD – Den sala di korte situá na Ingeniero Don Martina Bulevar (ántes Nieuwe Haven) tabatin riba djabièrnè mainta (20 di mart 2026) tratamentu di kasonan penal entre kua abuzu seksual di un mucha muhé menor di edat. Pa ta spesífiko ta trata akí di un hòmber haitiano di inisial F.D., kende tin 50 aña di edat i ta esun ku a presentá den sala di korte komo e akusado. Segun e dokumentonan, F.D ta akusá di tres krímen esta: (1) aktonan inmoral kometé dia 25 di yüli 2025 kontra di su propio yu muhé menor di edat. E dokumentonan presentá dilanti di wes señora mr. van Rijssen ta hasi menshon di penetrashon den vagina i parti patras, fulamentu na pechu i otro partinan sensibel di e mucha muhé akí su kurpa, masturbashon i hopi mishimentu. Mas aleu e akusashon ta ademas (2) violashon di un menor di edat ku ta kai bou di guia, kuido i responsabilidat di un siudadano adulto, esta su propio tata. Finalmente e akusashon kontra F.D. (3) ta poseshon di filmashonnan pornográfiko.

E akusado F.D. ya na kuminsamentu a ninga e akusashonnan ku su yu muhé a trese padilanti kontra dje kategórikamente, deklarando den sala di korte ku e yu muhé akí for di su temporada ainda mas hóben sa tin e mal kustumber di eksagerá, papiando kosnan ku apsolutamente no ta bèrdat. Enfin, segun e víktima e mester a lucha teribelmente kontra di su tata, kende a drenta den su kamber dia 25 yüli 2025, klaramente ku e intenshon pa viol’é. E violashon ku a tuma lugá kontra di e yu muhé akí tabata den oranan di mainta, esta pa 9or den e kamber ku e víktima akí sa drumi. Despues di e akto kastigabel akí e mucha a pasa over pa yama su mama na telefòn i un otro konosí, bou di yoramentu i sakamentu, insistiendo ku mester denunsiá su tata pa e hecho di a viol’é.

Durante tratamentu di e kaso tin hopi punto sumamente delikado ku a bini padilanti, esta ku a parse komo sifuera ku na sierto momento mama di e víktima no tabata muchu di akuerdo pa hasi denunsia, pa motibu ku den e kas kaminda nan ta biba, finansieramente mirá nan tabata demasiado dependiente di e akusado F.D., kende tabata esun ku ta trese plaka den kas. E akusado F.D ta traha den konstrukshon i tin 4 yu di kua 2 yu ku a nasé durante su promé matrimonio i 2 yu ku su kasá aktual. Tambe a sali na kla ku e akusado F.D. a laga instalá un kámara den e kamber di e yu muhé, pa vigilá tur esaki su pasonan. Pero segun F.D el a pone e kámara den e kamber únikamente pa kuida e mucha akí i asina ei evitá ku e yu akí ta sali for di su kamber bai (via bentana) sin konosementu di e mayornan.

Wes señora mr. E. van Rijssen tabata por la goma ku preguntanan hopi eksakto dirigí na e akusado, sitando for di prosèsverbalnan di polis, deklarashonnan ku a keda hasí anteriormente i dokumentonan ku a bini padilanti. Tambe Ministerio Públiko den persona di fiskal señora mr. M. Dennaoui-Simon a para ariba ku kulpabilidat di e akusado F.D., di orígen haitiano ta probá. E akusado F.D., sinembargo a sigui ninga, argumentando ku su yu a gaña riba dje. A konstatá ku algun di e imágennan di pòrno ku lo mester tabata riba telefòn di F.D., a keda kitá, pa stroba algun prueba hopi esensial. Sintá den sala di korte ku su trahe oraño di prizonero, transportá direktamente fo’i prizon na Koraal Specht, e akusado F.D., ningun momento so no tabata den un situashon kómodo. Na vários momento F.D, a kuminsá yora, bisando ku e tabata stima e yu akí i ku el a aktua puramente pa protehé. Kontestando wes su preguntanan F.D. a deklará ku e no sa si e por biba den e mesun kas ku e víktima akí mas, mirando e mal eksperensia ku el a pasa aden. Abogado señora mr. J. Joemmanbaks, enkargá ku e defensa di F.D. a insistí ku su kliente ta inosente ya ku e mucha muhé, segun e abogado lo no ta papiando bèrdat. Riba e pregunta di e filmashonnan pornográfiko konstatá riba telefòn di F.D., esaki a bisa ku ta trata akí di informashonnan ku e sa risibí di amigu i konosínan.

Fiskal señora mr. M.Dennaoui-Simon a demandá un kastigu di prizon di 24 luna di kua 12 luna kondishonal, kitando e periodo ku F.D a pasa den aresto preventivo, mas un periodo di prueba di 3 aña. E akusado F.D tin 7 luna enkarselá kaba. Wes mr. van Rijssen despues di un pousa kòrtiku a dikta sentensia, konkluyendo ku akusashonnan 1 i 2 ta sufisientemente probá, akusashon nr. 3 sinembargo ta djis un parti so ta probá ya ku algun di e imágennan pronográfiko (no tur) ainda a sigui aparesé riba e telefòn di F.D. Wes a yega na e kondena di 18 luna di prizon di kua 8 luna kondishonal, mará na un periodo di prueba di 3 aña. E akusado F.D., tin 2 siman pa disidí si e ta apelá e sentensia.