Minister Middelhof: Tin 1700 kupo di trabou i nan ta na disposishon spesial pa esnan sin trabou

WILLEMSTAD – Na Kòrsou tin preokupashon pa hopi hende ku ta den situashon di pobresa i ku lo no por soportá oumentunan di preis ku ta bini e.o debí na desaroyonan geopolítiko i guera den mundu. Tantu Minister Presidènt Gilmar Pisas komo Minister di Desaroyo Ekonómiko Roderick Middelhof ta mustra ku tin 1700 kupo di trabou habrí pero yunan di Kòrsou no ke e traha e trabounan ei. Gobièrnu no por keda duna un man, den forma di ònderstant, na esnan ku no tin entrada pa kria nan famia miéntras ku tin tantu kupo di trabou habri.

Preis di kuminda ta bai subi meskos ku preis di koriente, awa, gasolin i diesel. Minister Middelhof a indiká ku na e momentunan aki tin 1700 kupo di trabou habrí den horeka. Un bon ehèmpel ta e hotèl nobo TUI na Bándabou ku mester habri, i nan tin mester di 450 trahadó pa nan por habri na fin di aprel. E empresarionan a informá gobièrnu ku nan a publiká aviso den korantnan i via retnan sosial pa buska trahadó, pero nan no ta keda kla. Nan a hasi tur esfuerso pa buska trahadó.  Segun e minister, bira tempu pa yu di Kòrsou realisá i komprondé ku un hende mester kuminsá den sierto trabou abou pa krese i subi. No por yega na un trabou i kere ku por bira direktor òf manager den un frega di wowo. Mester kana yega einan! No por kere ku ta eksigí sierto posishon. Yu di Kòrsou no ke traha den bar i restorant pasobra mester traha anochi. Ademas mester traha den wikènt i riba dia di fiesta. 

Vakaturanan ta keda habri, i a bira tempu pa hendenan realisá kiko esei ta nifiká, spesialmente e 24.000 kasnan di esnan ménos pudiente, mester realisá ku tin trabou pa nan traha. Si nan keda insistí ku nan no ke hasi sierto trabou, ta nan mes ta provoká pa nan bai kai den pobresa. Gobièrnu no por keda karga, esta sigui duna ònderstant na esnan ku no ke traha, sino den futuro lo no por yuda niun hende mas. Tin 1700 vakatura den turismo i nan ta na disponibilidat di esnan ku tin deseo di traha.

Na opinion di minister Presidènt, mester tin unidat den famia pa esnan ku por, pa nan yuda esnan mas debil. Awor aki na Kòrsou tin demanda grandi pa yena kuponan di trabou. Asta ta asina ku Minister Hato ta bai inisiá e proseso pa hendenan indokumentá, pa nan por bira legal i asina nan por traha legal i aportá na e fondonan di SVB.

Sr. Pisas a bisa ku ora wak e akshonnan ku ta tuma pa buska trahadó, pa yena kuponan di trabou i di otro banda e kontestanan ku empresarionan ta haña di esnan ku no tin trabou, ta algu inkreibel. Yu di Kòrsou no tin trabou, pero e ta bisa e no ke traha anochi, e no ke traha wikènt, no ke trabou di laba tayo, pero ta e hendenan ei ta stens ku gobièrnu tin ku keda duna un man (ònderstant). Mester konsientisá nos pueblo, pasobra empresanan ta bisa ku nan no tin trahadó, miéntras ku tin kupo di trabou. Hopi bia ta hende fuerte i duru ku por traha, pero nan ta argumentá ku nan tin yu i ku p’esei e no por bai traha.