Akusado van der Slot a sali Mambo Beach, dal outo burachi, djis serka di kas

Den sala di korte e ulandes europeo di fam van der Slot, kende tin 71 aña di edat, a sinta konta presis loke a pasa kuné ku el a dal outo dia 20 di mart 2026, saliendo for di Mambo Beach. A bin sali na kla ku debidamente van der Slot a bebe bebida alkohóliko, pasobra el a skor ku e tèst di rosea 625 mikrogram.

Segun van de Slot, pa kuminsá e ta biba na mas òf ménos 500 meter di distansia for di Mambo Beach, komo tal un distansia ku fásilmente e por kana na pia. Riba e dia ariba menshoná a surgi un diskushon entre van der Slot i su señora, kende a rabia kana bai for di e sitio na pia. E akusado van der Slot sinembargo a keda na e sitio i a sigui dal algun trago mas, pero kuantu el a bebe presis, esei van der Slot no ta kòrda mas.

E hòmber van der Slot a kousa un aksidente di outo despues, di manera ku polisnan a presentá na e sitio i a transporté hiba warda di polis. Maske kuantu el a pidi pa dun’é un chèns pa sikiera yama su señora na telefòn pa splika na unda e ta na e momentonan ei, polisnan a ninga. Enfin, mirones na e sitio a tuma nota di van der Slot sintá den outo di polis na kaminda pa warda di polis i a yama e señora i asina ei a pone e señora na altura. Den sala di korte van der Slot a deklará ku e tin masha duele i bèrgwensa pa loke el a pasa aden, nunka promé den su bida el a yega di hañé ku hustisia. Abogado señora mr Terpstra a pidi pa tene konsiderashon ku su kliente, kende a sufri inmensamente pa e situashon hopi penoso di a hañé tin di haber ku outoridatnan di hustisia.

Fiskal señora mr. Scheer a mustra ku e situashon por tabata unu ainda mas pió, pasobra bou di influensia di alkohòl desgrasianan ku konsekuensianan teribelmente lamentabel sa sososdé. Fiskal señora mr. Scheer a elaborá un poko mas riba loke a sosodé pa finalmente hasi e demanda di un but na altura di e suma di 1400 florin mas e kurso di tráfiko sigur di 10 ora di durashon, mas e hecho ku pa 5 siman van der Slot ta pèrdè su reibeweis. Wes mr Leijten a mantené e kastigu kasi igual ku e demanda di fiskal, solamente e but a keda stipulá na 1200 florin, ku ta ménos ku e demanda di fiskal.  

Hóben di fam Dick a dal outo den palu di lus, kibra total-lòs

Un siudadano di fam Dick, kende tin 35 aña di edat dia 24 di yüni último tabata den sala di korte pa duna kuenta i rason pa un akto kastigabel ku el a kometé dia 1 di novèmber 2025 den tráfiko. E persona akí a manehá su vehíkulo bou di influensia di alkohòl i a kousa un aksidente di tráfiko, el a kore bai dal den un palu di lus, kantu di kaminda. Outoridatnan a konstatá ku el a skor ku 755 mikrogram riba e tèst di rosea. Den sala di korte e akusado Dick a rekonosé ku e tabata robes pa kore outo bou di influensia di alkohòl. E aksidente klaramente a hinka e hòmber akí den un situashon finansiero hopi pèrtá, pasobra ta gastunan grandi el a yama riba su mes. Ta bini aserka ku 5 luna el a keda sin reibeweis, komo tal mester a hasi uzo di bùs pa bai trabou i tambe e yudansa ku famia tabata dun’é. Fiskal a mustra ku normalmente ta e suma di 1800 florin e sentensia lo mester bira, pero a wanta e demanda na 1600 florin, despues ku e hóben a splika ku e por paga 300 florin pa luna so, pasobra e tin un otro gastu èkstra di 800 florin tur luna. Tantu wes komo fiskal a apresiá e manera kon e akusado Dick a komportá durante tratamentu di su kaso, rekonosiendo kabayerosamente ku e tin kulpa. Pues rason pa tene kuenta ku su situashon finansiero. Wes finalmente a kondená Dick na un but di 1200 florin, plus e kurso di tráfiko sigur di 10 ora, ku ta bou di ouspisio di Reclassering. Ta pèrmití e hóben Dick yega na un areglo di pago.

Merencia kondená pa menasa, maltrato i rankamentu di telefòn for di man di eks

Un siudadano di fam Merencia dia 29 di desèmber 2024 tabata na un fiesta di DOW kaminda a surgi un problema serio ku su eks frei di fam Martinus. Merencia entre tantu tin un otro señora, pero den bista di Merencia e eks frei a sigui ta molestié, sakando informashonnan delikado di Merencia den publisidat (riba facebook). Pa tal motibu Merencia a rabia i a bisa e eks di fam Martinus: “Awe sí e kos akí ta kaba, mi ta mata bo”. Ku moketa Merencia a bati e eks frei den kara, den wowo i na kabes, rank’e na su kabei i choké na garganta. Ademas Merencia ku forsa brutu a ranka e telefòn Samsung for di man di e eks frei, kende anteriormente a publiká e pòtrèt blo sunú di Merencia riba facebook. Pa e suseso aki Merencia a kai 11 dia será. Den sala di korte e kaso aki a bini ampliamente padilanti ku preguntanan skèrpi ku tantu fiskal señora mr. Scheer komo wes mr. van Rijsen a hasi na Merencia. Desishon final ta ku Merencia mester pa e suma di 708 florin na dano i perwisio. Merencia a kai será pa 11 dia den prizòn di manera ku su kastigu ta bira 60 dia den prizòn di kua 49 dia kondishonal.