Anastacia sentensiá na kastigu di prizòn di 9 di kua 3 luna kondishonal

Un siudadano di fam Anastacia dia 9 di febrüari 2026 a hasi su mes kulpabel na transportashon di 490 gram di hasj. Ta trata akí di un siudadano di 37 aña di edat, kende ta biba na Ulanda. Tratamentu di e kaso akí tabata djaluna 22 di yüni 2026, pero e persona no a presentá di manera ku korte a tuma desishon fuera di su presensia.

Tabata duana ku dia 9 di febrüari 2026 a tene inspekshon riba pasaheronan ku a biaha bini Kòrsou, pa den e maleta di Anastacia reis riba pasta di djente den kua vários blòki di e droga koló maron. A laga hasi prueba dor di laboriatorio ADC ku a konstatá ku ta trata akí enbèrdat di droga. Segun e deklarashon ku Anastacia a hasi na outoridatnan, e droga akí tabata pa uzo personal. Fiskal señora Karima Hara a proponé un kastigu di prizòn di 9 luna di kua 3 luna kondishonal, mará na un periodo di prueba di 3 aña. Wes mr. Sigmar Carmelia a bai di akuerdo ku e proposishon di fiskal mr. Hara, komo tal e kastigu di prizòn pa Anastacia a bira 9 luna di kua 3 luna kondishonal, mará na un periodo di prueba di 3 aña.

Windster kondená pa importashon di 2185 gram di hasj

Tabata 9 di febrüari 2026 ku un siudadano di fam Windster a trata di drenta Kòrsou ku 2185 gram di hasj, yegando for di Ulanda. Duana a hasi un inspekshon konsentrando riba su maleta i a reis riba blekinan di pomada, konteniendo e droga. Den bista di duana pa kuminsá a bin topa ku algun opheto duru, esta en total 4 bleki, den kada unu tabatin e droga. Remarkabel ta ku pa e akusado Windster di 36 aña di edat, ni ningun abogado no tabata presente na tratamentu di su kaso, pues a tuma desishon fuera di su presensia. Fiskal a demandá un kastigu di prizòn di 12 luna di kua 6 luna kondishonal mará na un periodo di prueba di 3 aña. Windster ta biba na Ulanda, den e área di Rotterdam. Wes mr. Sigmar Carmelia a konstatá ku e demanda kontra di Windster ta legalmente i konvinsentemente probá, komo tal a dikta e sentensia konforme e demanda hasí.

Kastigu leve pa Dinzey, kende a maltratá tata di kriansa

Un siudadano di fam Dinzey ku tin e edat di 30 aña tabata djaluna 22 di yüni 2026 den sala di korte, pasobra el a maltratá su tata di kriansa. Dinzey a dal e hòmber un moketa den kachete. E suseso akí a tuma lugá di 29 di aprel 2024, pasobra e tata di kriansa a kue Dinzey su yabi di outo. E víktima ta di fam Marselia, kende a bin resultá largu abou na suela despues di a keda agredí pa Dinzey. Den e dokumento di Ministerio Públiko tin pará mas aleu ku Dinzey lo a bati e hòmber ademas ku skòp, anto dal e tambe ku piedra na momento ku e tabata abou na suela. Dinzey sinembargo a rechasá e último akusashonnan akí kategórikamente. Tambe tin e keho entregá kontra di Dinzey ku via di e sla di moketa lo el a bula algun djente for di den boka di Marselia. Ademas Dinzey lo a menasá Marselia gritando: “Mi ta tira bo mata”. Di e akusashonnan entregá kontra di Dinzey ta solamente e maltrato ku moketa na kachete ta probá, nada di e djentenan ku lo a bula for di boka i tampoko e menasa ku tiramentu. Fiskal a hasi e demanda di kastigu di prizòn di 1 luna kondishonal, mará na un periodo di prueba di 1 aña. E kaso akí ta konsiderá un kaso bieu, fiskal a trese padilanti. Wes mr. Sigmar Carmelia a bai di akuerdo ku e demanda di fiskal i a dikta konforme e petishon di kastigu.