WILLEMSTAD— 3 ½ aña di trabounan balioso desplegá den sala di korte, señora Karima Hara tin skibí riba su nòmber komo fiskal di Ministerio Públiko. Un señora simpátiko, korekto i sumamente disipliná den su trabou, kende a atendé tur tipo di kasonan penal ku a presentá den korte di hustisia akí na Kòrsou, for di simpel infrakshonnan kometé den tráfiko te ku asesinato.

Ayera djaluna, 22 di yüni 2026, e señora akí a kumpli ku su último tareanan den kasonan ku e tabatin pa atendé ainda komo fiskal, pa pronto e subi avion bèk rumbo pa Ulanda. Hopi úniko ta di apresiá e hecho ku Karima Hara a preferá pa atendé tur e kasonan tratá ayera den nos dushi idioma Papiamentu. Na final di e seshon presidente di Korte di e islanan eks-Antia, señor mr. Sigmar Carmelia a dirigí algun palabra kaluroso na señora Karima Hara pa gradisí pa tur su esfuersonan.

Nos di Clarity Media News ta yama señora masha danki pa su kordialidat i ta deseé tur sorto di éksito den futuro, tambe nos ta spera ku lo e sigui bini Kòrsou maske ta pa pasa fakansi.