Kaso di siudadano ku a hòrta kooperativa ACU no a keda tratá den korte

WILLEMSTAD— Den e dokumentonan ofisial di Ministerio Públiko tin ampliamente deskribí e kaso di un siudadano di fam Leito, kende tin 64 aña di edat i ku a hòrta Kooperativa di Spar i Kredito ACU riba dia 13 di febrüari 2019 e suma di Cg 15169,90.

Siendo masha tempu ta konosí ku e kooperativa akí ta asina krítiko i ku posibilidatnan sumamente limitá pa sosionan (miembronan) di edat avansá na Kòrsou hasi fiansa, ta zona masha straño kon algu asina tòg por a sosodé. E persona ariba menshoná a entregá un petishon pa fiansa na rason di e suma di Cg 15119.90, yenando den su formulario di petishon ku e ta empleá na un di e ‘fast-food’-restorantnan mas konosí na Kòrsou. El a deklará ku e ta gana e suma di 3600 florin bruto na e empresa menshoná. Komo tal lo e mester a entregá deklarashon di dunadó di trabou, pruebanan di sueldo ku statements di banko etcetera ku lo mester a resultá di ta inkorekto, anto tòg su petishon a kondusí na e fiansa. Pues Leito den kaso akí ta keda akusá di falsifikashon di dokumento.

Mas aleu tin ademas otro akusashon kontra di Leito den e sentido ku lo el a logra kita plaka for di un empresa mas, deklarando ku e ta traha na Rooms Katholieke Centraal Schoolbestuur, ganando e suma di Cg 4254. Akí tambe Leito a logra entregá dokumentonan inkorekto pa por a logra su propósito. Den e dokumentonan no tin menshoná  kua abogado lo ta enkargá ku e defensa i posibelmente pa e echo ku Leito no tin un abogado ainda, tratamentu di e kaso a wanta pa tempu indefiní. Di nos parti ta e intenshon pa sigui e kaso aki ku hopi atenshon i eksaktitut, prinsipalmente pa echo ku hendenan di edat ku den pasado a aportá kabalmente na kresementu di e prestigioso instistuto finansiero koperativista akí, awendia no tin masha di spera den kaso ku nan mester hasi petishon pa fiansa. Mester mira ku wowonan di falki kiko ta pasando i kua ta e destino ku tin den tapara pa e kooperativa akí. 

Kaso di maltrato di tata ku yu Sebastiana den sala di korte

WILLEMSTAD— Djarason 17 di yüni e duo di fam Sebastiana (tata di 55 aña i yu di 21 aña) mester a presentá den sala di korte, pero ámbos a bria pa nan ousensia. No opstante esei tratamentu di e kaso a kontinuá, ku abogado mr. H.S. Johannes komo esun enkargá ku e defensa. Fiskal na nòmber di Ministerio Públiko tabata señora mr. E van der Zee i e wes ku a trata e seshon akí tabata señora mr. Groenendaal. E kaso a zona komo sifuera bastante brua den otro, anto tòg pa gran parti a konsentrá riba e hecho ku tata i yu Sebastiana lo a maltratá e siudadanonan J.M. Rodriguez Munoz i J.C. Rodriguez Arroyave ku pida pala i pipa di heru. Kiko eksaktamente tabata e rason pa tur e konsternashon no a keda tresé padilanti. J.M. Rodriguez Munoz i J.C. Rodriguez Arroyave tabata den e kas ku Sebastiana tabata hür ku nan, kosnan no tabata bai muchu bon i a bin surgi un pleitamentu. Hecho ta ku tantu tata komo yu Sebastiana a ninga redondamente ku nan a maltratá e duo J.M. Rodriguez Munoz i J.C. Rodriguez Arroyave. E punto ta sinembargo ku por a proba ku e personanan a keda heridá debí ku a haña slanan den kara i na kabes. Wes a yega na un kastigu di prizòn di 12 luna di kua 6 luna kondishonal pa tata i yu, mará na un periodo di prueba di 3 aña. Tata Sebastiana mester paga e suma di 1500 florin na daño i perwisio, miéntras e yu mester paga 750 florin.

.