Cannister sentensiá pa transportashon di droga

Den sala di korte a presentá djaluna 6 di yüli 2026, e siudadano di fam Cannister, kende tin 26 aña di edat i ta nasé na Ulanda. Cannister ta akusá di e hecho ku dia 17 di febrüari 2026, el a hasi su mes kulpabel na importashon di 985 gram di hasj for di Ulanda. Na outoridatnan di  duana finalmente Cannister a deklará ku e 985 gram di hasj ku el a drenta Kòrsou kuné ta pa uzo propio.

Den pasado kaba Cannister tabata den man di hustisia, komo tal e tabatin un kastigu bieu ta kologá riba su kabes. Pa su defensa, e akusado Cannister, tabatin abogado señora mr. Maritsa Becher. E abogado a hiba e defensa mustrando ku su kliente no ta di mal intenshon. Wes señor mr. P.M. Leijten i fiskal señora mr van der Zee sinembargo tabata di otro pensamentu. Pa kuminsá tantu wes komo fiskal tabata di opinion ku e kantidat di 985 gram di hasj ta demasiado pa uzo propio, indikando indirèkt ku Cannister, ku tur probabilidat lo kier a bende e droga aki tambe.

Fiskal en prinsipio a demandá un kastigu di 9 luna di prizòn pa Cannister i tabata ke pa tene kuenta tambe ku e akusado tin un kastigu ya kaba kologá riba su kabes. Finalmente wes a disidí ku un kastigu di prizòn di 9 luna di kua 5 luna kondishonal ta loke Cannister meresé. E kastigu ta keda mará na un periodo di prueba di 3 aña. All by all ta nifiká ku Cannister mester sinta 4 luna di kastigu den prizòn.

Siudadano Delano sentensiá fuera di su presensia

Dia 19 di febrüari 2026 outoridatnan na aeropuerto Hato a gara un siudadano di fam Delano ku 2300 gram di hasj. E hasj tabata paketá den un maleta ku un fondo dòbel. Na outoridatnan Delano a deklará ku ta un fabor el a bai hasi un otro persona. Una bes ku a gara Delano ku e droga, a tuma su pasaporte i telefòn temporalmente den ‘beslag’. Fiskal señora van der Zee, mirando e kantidat di hasj, esta kasi 2 ½ kilo, a demandá un kastigu di prizòn di 12 luna inkondishonal, pero wes señora mr. Los a kondená Delano na un kastigu di prizòn di 10 luna inkondishonal, añadiendo ku lo mester entregá Delano tantu su telefòn komo pasaporte bèk.

Martha den korte pa transportashon di paketenan konteniendo 663 gram di kokaina

Otro kaso di transportashon di droga  (kokaina) ku a hala atenshon ta esun den kua un siudadano di fam Martha ta envolví i ku a tuma lugá dia 22 di òktober 2024.

Ta trata aki di 4 pakete huntu ku e akusado a pone riba pòst, hasiendo un trabou pa un otro persona. Den sala di korte Martha a deklará ku el a haña e enkargo serka un persona, kende finalmente a manda e karga via un otro siudadano pa e pone riba pòst. Martha a ninga redondamente pa menshoná nòmber di doño di e droga. El a splika kon na Ulanda el a tuma nota di un kaso kaminda te den prizòn a manda e mensahe kla i raspá pa un persona ku a basha abou riba doño di droga, indikando ku di ningun manera e lo no ke pone su bida na peliger.

Wes mesora a mustra Martha ku responsabel pa e pakete ta Martha mes, ya ku ta e ta esun ku a pone e pakete riba pòst. Hasimentu di fabor, poniendo paketenan riba pòst, awendia no ta sin risiko e wes a sigui splika te den detaye. Remarkabel ta ku den pasado kaba Martha a yega di kai será na Ulanda pa transportashon di droga. Fiskal a demandá un kastigu di prizòn di 18 luna di kua 9 luna kondishonal, mará na un periodo di prueba di 3 aña. E demanda di fiskal ta eksaktamente e kastigu ku wes a dikta. Den bista di korte Martha mester sigui aseptá guia di Reclassering.