WiFi grátis riba tur konvoi di ABC

WILLEMSTAD – E kompania di transporte publiko, Autobusbedrijf a introdusi internet gratis riba 34 konvoi. Manera ta konosi e kompania Autobusbedrijf ta kai bou di Integrated Utility Holding (Aqualectra). Den un sosiedat ku tur dia ta bira mas digital ta krusial ku tur hende na tur momentu tin akseso na internèt. Pa hasi esaki posibel, ABC ta hasi uso di e konektividat di Qonèkt. Un posibilidat ku a surgi for di e sinergia ku ta eksistí entre ABC i Qonèkt awor ku nan ta parti di Integrated Utility Holding (IUH).

Pa e inougurashon invitadonan a hasi un paseo den konvoi hasiendo uso di internèt grátis. Na e okashon akí General Manager di Qonèkt sr. Rauf Engels a bisa ku pa Qonèkt e servisio aki ta muchu mas ku hasi disponibel teknologia. “Esaki ta trata bienestar. Ta trata di sigurá ku konektividat no ta disponibel solamente na kas, na trabou òf den ofisinanan, sino tambe den bida diario di siudadanonan. Tur hende mester tin un oportunidat hustu pa ta konektá ku internèt, ku informashon, ku oportunidatnan, i ku otro hende”, sr. Engels a bisa.

Sr. Raycelli Seferina, General Manager di ABC, a bisa ku orguyo e kompania ta dal un paso importante den transformashon di transporte públiko pa Kòrsou i ku e ta representá hopi mas ku simplemente internèt riba konvoi. “E ta e komienso di un trayekto kaminda teknologia ta transformá e manera ku hende ta eksperensiá transporte públiko. Un di e siguiente desaroyonan ta aplikashon di ABC, ku lo permití pasaheronan sigui nan konvoi den tempu real i sa eksaktamente ki ora e konvoi lo yega na e parada, pero tambe plania nan biahe ku mas seguridat, konfiansa i komodidat”, sr. Seferina a bisa.

CEO di IUH sra. Neysa Isenia a bisa ku WiFi riba bùs ta resultado di sinergia di kolaborashon entre dos kompania ku ta forma parti di IUH pa implementá vishon stratégiko i realisá transformashon digital. ”Loke e proyekto akí ta hasi ta ilustrá kiko ta di balor agregá di ta forma parti di IUH. No solamente ora wak den futuro, pero por mira esaki for di awor kon dos kompania den IUH a kombiná nan respektivo eksperensia pa hasi WiFi riba konvoi un echo”, sra. Isenia a bisa.

Pa e proyekto akí ABC a haña kolaborashon tambe di CTB. Pa CTB nan partisipashon no ta un invershon den transporte públiko. E ta un invershon den eksperensia di e bishitante i e posishon kompetitivo di Kòrsou komo destinashon turístiko. Minister di Tráfiko, Transporte i Planifikashon Urbano sr. Charles Cooper a felisitá IUH i su kompanianan pa e akshon proaktivo akí. “E ta un desishon ku ta apoyá gobièrnu su vishon mas amplio di un infrastruktura moderno i digitalisá, kaminda ningun siudadano ta keda atras”, minister Cooper a bisa.