WILLEMSTAD – E kaso di hustisia ku en prinsipio tin di haber ku un di e peloteronan grandi na Merka, esta Jonathan Schoop, djabièrnè 8 di mei a bolbe pasa un ratu den sala di korte na momento ku un otro pelotero den persona di Basilia (25 aña di edat) via su abogado señora mr. Athena Sulvaran a pidi pa suspendé esaki su detenshon temporalmente.

E petishon akí ta pendiente e fecha ku lo trata e kaso aki riba kontenido na luna di ougùstùs binidero. Den e kaso di Basilia, meskos ku Seferina, a subi riba mesa e petishon por eskrito di parti di klup di beisbòl Wild Cats pa korte duna e detenido aki libertat temporalmente. Temporada di beisbòl ta bai kuminsá i e klup tin mester di Basilia.

Basilia ta un pelotero profeshonal ku ta netamente esun enkargá ku krio di su famia, inkluso yunan menor di edat. Sin entrada awor ku Basilia ta enkarselá, esaki ta bai perhudiká su famia inmensamente. Abogado señora mr. Athena Sulvaran a argumentá ku su kliente lo duna tur koperashon nesesario na hustisia, esta sòru pa akudí den kaso ku mester presentá pa interogashon, no drenta den kontakto ku otro sospechosonan, presentá den sala di korte na momento di tratamentu di e kaso riba kontenido.

Fiskal mr de Graaf na nòmber di Ministerio Públiko a rechasá e petishon pa skòrs detenshon di Basilia, añadiendo ku den e kaso aki ta trata di un arma di kandela ‘full’ outomátiko (sumamente peligroso), ku Basilia ta responsabel pe. Mester warda riba resultado di NFI na Ulanda i asuntunan di DNA. Den bista di e fiskal e argumentonan pa laga Obispo den libertat temporalmente, no tin muchu peso. Obispo, segun e fiskal, mester tabata sa adelantá ku su famia ta finansieramente asina dependiente di dje. Mas aleu e fiskal a lansa un señal di krítika fuerte den direkshon di klup di beisbòl Wild Cats, bisando ku e no ta komprondé kon Wild Cats no ta skohe pa kondená siudadanonan ku ta kana ku arma di kandela sumamente peligroso. Kòrsou ta pestá ku arma di kandela ku ta sigui den sirkulashon, di manera ku kada biaha ta surgi kualke likidashon teribel, e fiskal a kontinuá su argumentashon. Fiskal despues a para ariba pa bisa ku libertat di Basilia lo nifiká un shòk pisá pa komunidat di Kòrsou. Abogado señora mr. Athena Sulvaran no tabata di akuerdo ku e ponensia di fiskal i a mustra ku tin kasonan kaminda siudadanonan tòg a haña libertat temporalmente. Ademas e argumento ku lo ta trata aki di un shòk propiná na komunidat di Kòrsou, e no a sintié ningun momento so, siendo e ta konsiderá su mes un siudadano ku kontaktonan amplio i estrecho ku e komunidat kurasoleño.

Tratamentu di e kaso aki a tuma lugá atraves di vidio conference ku Aruba. Wes despues di a skucha tur e argumentunan tresé padilanti a rechasá e petishon pa skòrs detenshon di Basilia temporalmente. Tratamentu di e kaso lo ta kasi na fin di ougùstùs i Basilia mester warda tratamentu di su kaso den prizòn.