WILLEMSTAD – Dia 11 di òktober 2025 un siudadano a konstatá un komportashon masha sospechoso mes na altura di santana di Otrobanda, hopi serka di Kentucky Fried Chicken (KFC Colon), aya na Swammerdamstraat. Esei mesora tabata motibu pa yama polis pa presentá na e sitio. Una bes na e lugá, polisnan a reis riba e siudadano di fam Michel (18 aña di edat), kende segun su deklarashon na polis, e tabata wardando riba un amiga pa bin trese karchinan di fiesta pe. Michel tabata den un outo Chevrolet Spark koló blou ku el a hür, siendo e no tin reibeweis. E outo na momento ku polisnan a yega, ainda tabatin su motor sendé.

Miéntras polisnan tabata den kòmbersashon ku e siudadano Michel, pa sa kiko presis e tabata hasi na e sitio ei, a zona riba portofon e notisia ku 3 hòmber tabata tirando un atrako armá den Kentucky Fried Chicken (djis serka). E trio ku karanan tapá a drenta KFC-Colon via di e benta di ‘drive-thru’. Polisnan mesora a konkluí ku lo mester tin algu robes ku Michel na e sitio, sintá den outo ku lusnan di e outo sendé i e motor di start, wardando. Komo tal mesora polisnan a aktua teniendo e hòmber aki bou di sospecho. Pues ta djei a kuminsá mesora un investigashon ku a bin kulminá den tratamentu di e kaso ku Michel djabièrnè 8 di mei último den sala di korte komo komplise den e atrako den KFC-colon.

Den sala di korte djabièrnè 8 di mei a resultá enbèrdat ku Michel tin di haber ku e atrako armá, tirá den Kentucky Fried Chicken Colon dia 11 di òktober 2025. Segun Michel, e tabata riba e fecha menshoná na kaminda den su outo saliendo for di Sambil rumbo pa Wishi-Marchena. Áwaseru tabata kayendo i na sierto momento el a mira 3 hòmber riba kaya, na altura di e carwash, serka di pòmp di gasolin na Kolebra Bèrdè, dunando señal pa e para e outo pa duna nan un kabes di boto.

Segun Michel awa tabata kai i esei tabata e motibu prinsipal pa e duna e tres hòmbernan un kabes di boto i baha nan na Colon den Otrobanda. Ademas e ta un persona ku gusta yuda hendenan ku ta pasando den kualke difikultat. Michel durante tratamentu di e kaso den korte a sigui insistí ku el a sali kas pa buska karchi di fiesta, komo tal e no tin nada di haber ku e atrako den Colon. Na promé instante Michel a ninga redondamente ku el a duna e tres hòmbernan kabes di boto, pero despues ku a konfront’é ku imágennan di vidio di manera ku por a mira klaramente kon e tres hòmbernan a baha for di su outo, Michel a kambia su deklarashonnan.

Michel a bisa ku e hòmbernan a obligué di sinta den outo warda nan, despues ku el a baha nan na Colon. Mas aleu Michel a trese tambe padilanti ku el a mira un di e hòmbernan ku 1 arma di kandela, loke a duné, ainda mas miedu. Tambe Michel a deklará ku polisnan a maltraté pisá, baitié ku skòp, siendo e tabata di bui i totalmente indefenso.

E tres hòmbernan a drenta KFC-Colon via e bentana di drive thru, ku karanan tapá, menasando 3 trahadó ku arma di kandela, despues saka lachi di e kaha di plaka na rason di e sumanan di 1750 florin karibense i 103 dòler merikano bai kuné. Polisnan a haña yamadanan telefóniko di un kliente femenino ku a duna te den detaye loke el a tuma nota di dje. Banda di St. Jozef school i despues banda di e santana a mira e 3 hòmbernan kore yega, dos di nan a drenta e negoshi via e bentana ‘drive thru’. Un di e tres hòmberan tabatin 1 arma di kandela den man. Diferente interogashon Michel a keda konfrontá kuné i kada biaha e situashon tabata mas difísil pa Michel, pasobra mas i mas a kuminsá parse ku debidamente e ta metí den e atrako tirá na KFC-Colon dia 11 di òktober 2025.

Promé Michel a ninga ku ta for di su outo e atrakadónan a baha, pero despues ku el a aseptá el a bisa ku nan a menasé i obligué pa para warda. Den sala di korte sinembargo Michel a sigui ninga ku e ta den e atrako, bisando ku ta un akto bondadoso el a bai hasi dor di duna e trio un ‘lift’. E tres atrakadónan akí a abuzá di su konfiansa.

Fiskal a bisa ku pa loke ta e demanda, e ta tene kuenta sigur ku e maltrato innesario ku Michel a sufri na man di polisnan. E maltrato segun e fiskal tabata desproporshonal i kontra di e prinsipio i proseduranan vigente den kaso di detenshon. No tabatin ningun resistensia di parti di Michel, ni intento pa hui. Michel tin un pasado ku hustisia, esei ta tantu na Kòrsou komo na Ulanda. Na Ulanda por ehèmpel e tabata dia 5 di desèmber 2024 envolví den un transakshon di droga. Ademas fiskal señora mr. Scheer a deklará ku mester tene kuenta ku Michel ta fásil pa influensiá, anto tambe mester tene kuenta ku e rekomendashonnan di Reclassering. Fiskal na nòmber di Ministerio Públiko a yega na un demanda di 24 luna kastigu di prizòn di kua 12 luna kondishonal. Wes mr. Foppen a keda ku dia 21 di mei binidero lo e dikta sentensia. E wes ke tuma tempu pa studia tur loke a keda tresé padilanti