WILLEMSTAD – Siudadanonan ku un mentalidat di vagabundo, den mayoria kaso no tin un adrès fiho, pasobra nan ta kana slènter riba kaya i drumi na unda ku ta. Esaki klaramente ta parse di ta e kaso ku e siudadano E. Silva, kende tin 66 aña di edat i ku djabièrnè 8 di mei a bolbe keda sin presentá den sala di korte.

Abogado mr. H.M.M. Alejandra sí tabatei i na nòmber di e kliente aki. Pero e abogado no por a duna ningun splikashon ku ta konserní paradero di Silva, dikon esaki tabata ousente atrobe. E akusashon kontra di Silva ku fiskal señora mr. T. Keller a trese padilanti ta ladronisia di koper den kurá di un kas situá na Eskimoweg riba 5 di sèptèmber 2025. Doño di kas òf ta bisiñanan a sera kabes gara e siudadano aki, tené te ora ku polisnan a presentá na e sitio. No a keda Silva nada otro, sino rekonosé su kulpabilidat i atmití ku el a destruí propiedat di otronan, en buska di koper, pasobra e tabatin nesesidat di plaka. Tabata un destrukshon teribel ku a resultá demasiado kostoso. Pues e akusashon ta legalmente i konvinsentemente probá.

Silva no ta un deskonosí pa hustisia, e tin un rèkòrt ya ku na aña 1992, 1993, 1994, 1996, 2018 el a keda akusá di diferente akto kastigabel kometé i na Ulanda tambe Silva a hañé den gara di hustisia.  Maske kuantu profeshonalnan di instansianan manera Reclassering ta purba pa kambia Silva su mal komportashon i aktonan kastigabel, no ta logra. Kada biaha Silva ta bolbe kai bèk den e mesun tipo di problemanan. E siudadano aki simpelmente no ta koperá ku instansianan ku akudi pa duné yudansa. Fiskal a demandá un kastigu di prizòn di 12 luna di kua 6 luna kondishonal. Kastigu di trabou lo no yuda i Reclassering tampoko no ta konvensí ku por gana Silva riba e bon kaminda. Finalmente korte a bai di akuerdo ku un kastigu di prizòn di 9 luna di kua 6 luna kondishonal. E demanda pa daño material a keda aseptá, pero no e daño inmaterial.

.