E promé pasonan pa un “Heritage Experience Center” na Jan Kok

Willemstad – Stichting Monumentenzorg Curaçao ta buska un empresario kreativo den e sektor di “Food & Beverage” pa desaroyá un kònsèpt nobo di restorant na Lanthùis Jan Kok. E lokalidat di horeca lo forma parti di e futuro “Heritage Experience Center” na Bandabou. E apertura di e restorant ta planeá pa kuminsamentu di aña 2027.

Lanthùis Jan Kok, ku ta bou di maneho di e fundashon, despues di mas ku un kuarto di siglo di a hospedá e galeria di arte di Nena Sanchez, lo haña un destino nobo na final di aña benidero. Komo parti di e meta estatutario pa stimulá konsenshi i edukashon tokante herensia arkitektóniko, un sentro interaktivo di deskubrimentu pa hóbennan tokante herensia arkitektóniko lo wordu realisá aki. Komo komplemento di e sentro aki, Stichting Monumentenzorg Curaçao ta buska un empresario kreativo den “Food & Beverage” ku un vishon distinguí i aksesibel, ku ta kuadra ku e karakter di Bandabou i Kòrsou.

Direktora di Stichting Monumentenzorg Curaçao, Maghalie van der Bunt-George, ta splika:
“Nos ta pensa riba un kònsèpt di restorant pa henter famia, kaminda ingredientenan lokal, noa tradishonnan i nos kultura ta wordu interpretá den un manera moderno pa kreá un eksperensia úniko pa bishitantenan. E lokalidat ta ofresé espasio pa un interpretashon inovativo, for di un kònsèpt di restorant den airu liber te na un interpretashon moderno di un restorant den lanthùis. Tantu empresarionan ku eksperensia den horeca komo talento nobo ku un vishon fuerte ta wordu invitá pa registrá pa eksplorá oportunidat aki.”

Ku bista riba e saliña di Rif Sint Marie i e flamingonan ikóniko, Lanthùis Jan Kok ta ofresé un lugá speshal kaminda herensia, naturalesa, laman i historia ta bin huntu. No ta un lokalidat tradishonal di horeca, pero si un destinashon kaminda bishitantenan lokal i internashonal por eksperensiá Kòrsou pa medio di paisahe, historia i sabornan lokal. Lanthùis Jan Kok, situá den e área di Sint Willibrordus, ta konta entre e lokalidatnan di herensia mas karakterístiko di Kòrsou. E lanthùis tin un bista riba e saliñanan di Rif Sint Marie, kaminda flamingonan ta forma parti di e paisahe diario i kaminda naturalesa, laman i historia ta bin huntu. Desde 1999, e plantashi, e lanthùis i e saliñanan ta propiedad di Stichting Monumentenzorg Curaçao, ku ta komprometé ku preservashon di e lugá speshal aki.