WASHINGTON – Manera ta konosí Rei Willem Alexander i Reina Maxima ta na Merka pa un bishita di trabou. E pareha real ta keda drumi den Kas Blanku i ta partisipá na un sena spesial. E premier hulandes Rob Jetten tambe ta tuma parti na e enkuentro ku presidente Donald Trump.

E pareha real a asistí tambe na un enkuentro na Washington unda a topa ku representantenan di empresanan hulandes i tambe merikano, meskos a topa tambe ku institutonan kultural i gobernashon merikano.

E bishita di e pareha real na Merka a kuminsá for di 13 di aprel na Philadelphia, Pennsylvania pa despues sigui pa Washington D.C i finalmente nan ta bai Miami unda lo topa ku mandatarionan di Kòrsou, St.Maarten i Aruba. Semper Merka ta un aliado masha importante pa Hulanda i Reino Hulandes. Meta di e bishita ta pa intensivá e relashon i koperashon riba diferente tereno.

Den un komentario premier Jetten a duna detayenan di su partisipashon. El a splika ku den un kombersashon na Kas Blanku ku presidente Trump a papia riba e relashonnan speshal i profundo entre Merka i Hulanda. A papia tokante e fuerte relashon di komèrsio i kon e paisnan ta traha huntu riba seguridat, manera den e aliansa di OTAN. Naturalmente a trata tambe e situashon resiente den i rondó di Iran. Segun Jetten, ta importante pa yega na un solushon duradero i evitá eskalashon nobo. Tambe e agreshon kontinuo di Rusia na Ukrania tabata un tema importante den e kombersashonnan.