ORANJESTAD – Polis a realisá detenshon di kuater persona relashoná ku droga. Bosero polisial di Aruba ta informá ku djabièrnè 10 di aprel 2026 Unit Narcotica a tene un akshon na diferente adrèsnan ku a resultá den desmantelashon di plantashon grandi di droga. E adrèsnan tabata na Seroe Blanco, Bernadetastraat, Korvetstraat y Edisonstraat.

Durante e investigashon na e sitionan menshoná, polis a deskubrí diferente kultivo di mariwana. A konfiská un total di 354 mata di mariwana, banda di un kantidat konsiderabel di e mesun droga ya prosesá. Ademas a konfiská un gran kantidat di artefakto y produktonan ku ta uza pa e plantashon y mantenshon di e matanan aki. Durante e entrada hudisial a hasi detenshon di 4 persona . Ta trata di G.V.M. nase na Aruba di 38 aña, C.P.K. nase na Aruba di 50 aña, S.K.J.D. nase na Aruba di 25 aña y S.E.L. nase na Aruba di 56 aña.

Na e accion a forma parti diferente departamento di Kuerpo Polisial. Ta trata di Unidat K-9, personal di polis uniformá, Flex Team y RRT. No ta deskartá ku lo tin mas detenshon den e dianan. Polis NO ta para ketu y e akshonnan aki lo sigui pa keda kombatí kriminalidat y e trafikashon di droga den barionan.