Despues di un periodo di malesa sofokante, dr. Rutsel Silvestre J. Martha no ta ku nos mas. El a bandoná e mundu akí pa semper, despues di a hiba un lucha balente i digno kontra di su malesa.

Nos ta despedí di un yu di Kòrsou, un akadémiko di taya, ku a okupá tur sorto di puesto klave tantu na Kòrsou komo den eksterior. Un hòmber inteligente, sumamente sabí, ku tantu echo a demostrá ku den e mundu akí ta sabiduria i inteligensia, apliká na momentu esensial, ta habri kaminda pa duna direkshon i pa yega na solushon nesesario i duradero pa pais i organisashonnan ku el a sirbi.

Rutsel Martha tabata semper skèrpi den su formulashon, eksakto den su palabra i ku un sentido genuino di rèspèt i konsiderashon pa tur hende.

Nasé den bario di Marie Pampoen, di mama i tata di poko rekurso, Rutsel for di mucha a sobresalí pa su forma ingenioso di argumentá, splika i konvensé. Den un kwis entre skolnan sekundario na Kòrsou, hopi aña pasá, el a representá Mgr. Zwijsen College huntu ku otro studiante di su edat. Tabata un goso inmenso pa skucha kon Rutsel tabata kontestá, kasi semper ku konosementu profundo, pashon i un sentido di perfekshon.

Aktivo den Jongewacht di Steenrijk, semper motivá pa futbòl, e tabata kla pa harma un tim djis pa un ratu den kurá di misa di Steenrijk òf den kurá di Sentro di Bario Steenrijk, patras di misa. Si su tim pèrdè, bo por a ferwagt ku algun ratu despues Rutsel lo ta bèk ku un otro tim pa tuma revancha. For di e tempu ei ya el a mustra ku e no konosé e palabra ‘entregá’. Un luchadó inkansabel.

For di su temporada na Zwijsen College nos por a mira su perseveransia pa yega kaminda e kier a yega. Ku determinashon inmenso el a bira dòbel akadémiko, ku e gradonan di mas haltu. El a fungi komo diplomátiko, polítiko, gobernante, konsehero, dosente i hopi mas.

Komo invitado den mi programa na radio, ami konsientemente tabata usa dr. Rutsel Martha komo ehèmpel (sí komo modelo), un yu di nos pueblo di mesun bario Marie Pampoen ku mi. Kada biaha mi tabata hasié pa mustra kuantu orguyo mi ta sinti di a lanta huntu kuné den Marie Pampoen. I mi ta konvensí ku e mesun sentimentu ei ta biba serka hopi otro, spesialmente na momentu ku el sa sali padilanti pa defendé bienestar di Kòrsou.

Dr. Rutsel Martha no ta ku nos mas. El a tuma despedida, lagando un Kòrsou atras ku semper el a karga ku orguyo den su kurason. Un Kòrsou profundamente agradesido pa su aporte ku a engrandesé nos tur, di un manera òf otro.

– DANKI. SOSEGÁ NA PAS, RUTSEL –

E.A.R