WILLEMSTAD – E siudadano femenino N. Jansen di 44 aña di edat, aktualmente enkarselá den prizòn na Koraal Specht, djabièrnè último (29 di mei 2026) tabata den sala di korte akusá di a kometé un akto sumamente violento i agresivo kontra di un ser kerí di dje. E suseso aki tabata dia 25 di febrüari 2026.

Riba e imágennan di vidio ku a pasa den sala di korte por mira klaramente kon Jansen tabata zuai ku un opheto skèrpi den direkshon di su frei di fam Scharbaai. Konsekuensia di esaki ta ku Scharbaai a keda heridá den pechu.

Fiskal señora mr. E. van der Zee, kende a hiba palabra na nòmber di Ministerio Públiko a opiná ku akí ta trata di un kuchú, pero Jansen a bisa enfátikamente ku tabata nada otro sino 1 skrufdrai. Tabatin un pleitu entre e wela di Scharbaai ku Jansen. E mucha hòmber Scharbaai a bai intermediá pa plakiá kos, pero e situashon a empeorá i a kue e buèlta kaminda Jansen a baha ku e opheto skèrpi riba Scharbaai. Riba imágennan di vidio por mira e siudadano Jansen sumamente rabiá, banda di un outo e tabata, pero despues ta kana bai den direkshon di Scharbaai, kende Jansen a hinka ku e kuchú. Den sala di korte Jansen a deklará ku loke a sosodé tabata puramente pasobra e tabata sumamente rabiá i tur loke a pasa tin di haber tambe ku e echo ku e famianan presente tur a bini riba dje, anto esei a poné sinti ku e mester defendé su mes. Pero wes mesora a reklamá ku ningun di e otronan no tabatin un arma den man.

Jansen a reakshoná, bisando ku e vidio kaminda hendenan a bai pa tira riba su yu, esei no a mandé rònt, ku tambe ta un akto sumamente ferfelu ku el a eksperensiá. Fiskal señora mr. van der Zee a sigui puntra si loke Jansen tabatin den su man enbèrdat tabata un skrufdrai i no un kuchú, pasobra tur hende por mira ku ta trata akí di un kuchú. Jansen na su turno a persistí ku tabata un skrufdrai.

E akusado Jansen mas aleu a atmití ku e tabata robes i el a pidi despensa pa loke el a hasi. Pero Jansen a sigui bisa ku su problema tabata ku wela di Scharbaai. A bini padilanti tambe ku Jansen, durante e bululú a kibra un kadena na garganta di Scharbaai. E víktima Scharbaai ku tabata presente durante tratamentu di e kaso, den sala di korte, a mustra ku e kadena ku Jansen a kibra na su kurpa tin hopi balor pe, pero finalmente tòg no a duna importansia na e problema di e kadena. Scharbaai tabata ke dano i perwisio, pero no a sigui insistí.

Profeshonalnan manera entre otro sikater dr. Heytel a konstatá ku Jansen no tin problemanan emoshonal ni mental di gravedat, pero e señora akí meresé tratamentu via di Reclassering pa siñ’é atendé ku su agresividat. A puntra kiko a kousa un eksploshon asina teribel di parti di Jansen, si ta droga òf alkohòl Jansen a uza riba e dia ei? Jansen a mustra ku apsolutamente e no sa uza e kosnan ei. Fiskal ke pa imponé ku Jansen lo no tin kontakto mas ku Yolanda. Jansen a sigui bisa ku e ta pasando hopi malu den prizòn. Fiskal finalmente a demandá un kastigu di prizòn di 36 luna di kua 6 luna kondishonal pa e akusado N. Jansen. Wes a keda ku dia 5 di yüni binidero lo dikta sentensia.