Sigui uza, blue wave, pa lanta e ambiente ainda mas

E echo ku nos tin un tim pa representá nos komunidat kurasoleño na Mundial di Futbòl 2026, ta un logro inmensamente grandi. El a demostrá klaramente ku, maske nos ta e komunidat mas chikitu na mundu ku ta den mundial, nos tin sufisiente potensial pa sigui eksitosamente padilanti.

Tur lider, tur polítiko, tur gobernante, tur direktor di empresa, tur empresario mester aportá na e okashon tan spesial akí pa mantené e logro akí mas tantu posibel bibu.

Ta di lamentá ku nos a laga luna, siman i dianan pasa bai sin hasi muchu mas. Pero ainda nos por laga kreatividat, sentido di konfiansa den futuro i e nesesidat pa posishoná nos identidat kolektivo mas fuerte, dominá bou di e sirkunstansia aktual.

Mester mantené e ola di Blue Wave mas tantu posibel na Kòrsou i den mundu. Ounke e resultadonan di e partidonan kontra di e ekiponan nashonal di Alemania, Ecuador i Kosta di Marfil lo demostrá kon nos forsa ta realmente den un kompetensia mundial kontra ekipo asina fuerte, e resultadonan no mester desanimá nos selekshon, ni e komunidat di Kòrsou. No laga parse komo sifuera ta santu a tira den nos kuminda.

Kòrsou ta na kaminda, shonnan. Esaki ta nos promé partisipashon na e torneo mundial di futbòl i ta lógiko ku mester siña for di dje pa nos tin mihó chèns den futuro.

Kòrsou tin tur rason pa sigui selebrá e echo ku nos ta e komunidat mas chikitu na mundu ku a alkansá un partisipashon na Mundial di futbòl, pa enfrentá ekiponan sumamente fuerte ku tin tur rekurso nesesario pa tene e tradishon futbolístiko na laira i duna e resultadonan deseá.

Ban krea un ambiente sano den Kòrsou mes, disfrutando full di e Mundial di Futbòl 2026, den seno di famia, amigu i demas konosí. No laga apsolutamente nada stroba esaki!

Ku e spiritu di union i konfiansa pa krea un base sólido pa futuro, nos mester bai pa krese e amor pa futbòl i demas ramo di deporte, fortifikando nos sistema di dedikashon i asumí responsabilidat pa kualke kousa.

Bon mirá, no ta trata akí djis di un partisipashon na Mundial di futbòl. Ta trata di nos presensia riba plataforma mundial, e oportunidat pa eksponé Kòrsou dilanti pueblonan di mundu i e fe ku nos tin di por sigui logra.

Mester tene bon kuenta ku media hulandes. Nan relatonan den korant i otro medionan na Hulanda ta kapas pa presentá puntonan sumamente doloroso i devastador kontra Kòrsou, kalifikando Kòrsou su partisipashon na Mundial komo frakaso. Ounke Hulanda ainda nunka no a bira kampion mundial, no keda strañá ku na Hulanda tin un grupo ku lo sali i bisa abiertamente ku Kòrsou no tin nada di buska na Mundial di futbòl.

Segun e grupo di e hendenan akí, nos komunidat kurasoleño mas bien mester sirbi pa aportá ku hungadó na e selekshon di Hulanda i no presentá ku un propio ekipo.

Enfin, Kòrsou su partisipashon na Mundial di Futbòl 2026 klaramente ta un apertura sumamente interesante. Lógikamente e ta muchu mas ku representashon di un ekipo di futbòl so; e ta hasi pueblonan di mundu sa i bira muchu mas konsiente di nos eksistensia. E nòmber di Kòrsou ta bai zona pa benefisiá nos den múltiple sentido.

Na tur lider, tur polítiko, tur gobernante, tur direktor di empresa, tur empresario i barionan di Kòrsou: mi petishon kaluroso pa aportá na e okashon tan spesial akí, pa mantené e logro akí mas tantu posibel bibu.

Pabien na nos selekshon nashonal ku lo ta na Mundial i na pueblo di Kòrsou. Laga nos kada un ta konsiente di loke ta pasando: “Biba Kòrsou!”.

Erwin Raphaëla