Merka ta bai deporta presunan pa Jamaika

KINGSTON, JAMAICA – Jamaica a lanta den gran espektativa, mirando ku tin negosiashonnan tumando lugá pa un akuerdo ku ta enserá ku Jamaica lo aseptá kriminalnan será den prizonnan merikano ora ku Merka deportá e hendenan aki. E kondishon prinsipal ta ku e kriminalnan no ta jamaikino.

Segun un MOU den konsepto, ku ta deskribí den un dokumento di Embahada Merikano na Kingston, Merka lo por transferí te 25 stranhero pa Jamaica kada dos siman. Den e proseso aki ta evaluá kaso pa kaso. E areglo por envolví miles di persona den futuro, aunke no a spesifiká un durashon konkreto. Den e kuadro proponé, Merka lo manda petishon di transferensia pa gobièrnu di Jamaica, ku lo mantené e outoridat pa aprobá òf rechasá kada kaso. E akuerdo lo no inkluí siudadanonan jamaikano, menor di edat ku no tin un mayor huntu ku nan, ni personanan kondená pa delitonan kriminal serio. E eksepshon ta esnan ku ta seraa relashoná ku violashon di lei di imigrashon merikano.

Promé ku kualke transferensia tuma lugá, outoridatnan jamaikano lo risibí tur informashon disponibel tokante e persona proponé pa deportashon, inkluyendo datonan biográfiko, médiko i kriminal. E dokumento tambe ta indiká ku tur dos pais tin intenshon di aktua di akuerdo ku nan obligashonnan bou di e Konvenshon di Refugiado di 1951 i otro kompromisonan legal internashonal. E proposishon ta bin den un momentu di mas atenshon i kontròl riba akuerdonan di deportashon pa terser pais, despues di e kaso di 2025 di e jamaikano Orville Etoria. Outoridatnan merikano a deport’é pa e pais afrikano di Eswatini, apesar ku e no tabatin ningun konekshon ku e pais ei. Finalmente a deport’é pa Jamaica despues di kritiká internashonal i intervenshon diplomátiko.

E konsepto di akuerdo ta stipulá ku esnan deportá lo yega via e aeropuerto Norman Manley International Airport, kompañá pa personal di e Departamento di Seguridat Interno di Merka (Department of Homeland Security). Merka lo suministrá outoridatnan jamaikano ku un lista di pasaheronan (flight manifest) por lo ménos 72 ora promé di kada transferensia, i Jamaica lo mester duna un kontesta den 36 ora tokante e kasonan ku a keda aprobá.

Un medida di protekshon den e proposishon ta ku lo suspendé temporalmente transferensianan adishonal si 10 òf mas hende deportá keda na Jamaica pa mas ku 30 dia. Sin embargo, Jamaica lo mantené e opshon pa aseptá un kantidat mas grandi di hendenan deportá si e pais mes disidí di hasi esei. Ounke e MOU no ta kreá obligashonnan finansiero legalmente, Merka a indiká ku por hasi uso di fondo disponibel pa asistensia ekstranhero pa sostené e inisiativa i paga organisashonnan internashonal ku ta brinda servisio na personanan transferí. Tantu Jamaica komo Merka lo por terminá e areglo na kualke momentu ku un aviso por eskrito di 90 dia pa medio di kanalnan diplomátiko.