Roseburg akusá di maltrato lo tende su kondena dia 20 di yüli binidero

WILLEMSTAD– Un siudadano di fam Roseburg, kende tin e edat di 39 aña, tabata den sala di korte djaluna 29 di yüni 2026, akusá di maltrato di un señora di fam Elerie. Tantu e akusado komo su abogado ta di fam Roseburg.

E maltrato segun e dokumentonan ku Ministerio Públiko a presentá a tuma lugá dia 28 di ougùstùs 2025. E abogado ku a hiba e defensa pa e akusado ta señora mr. S.D.M Roseburg. Remarkabel ta ku e víktima tambe a presentá ku un abogado. A bini padilanti ku e akusado Roseburg lo mester a maltratá ku pushamentu, batimentu ku skòp di manera ku Elerie lo a kai na suela. E viktima lo a trese pòtrètnan di dòkter komo prueba di maltrato atraves di partinan ku a keda blou na su kurpa. Ademas Roseburg lo a ranka telefòn for di man di e víktima i na sierto momentu a surgi un bringamentu entre e duo. Un ke otro tin di haber ku pòtrètnan i vidionan ku e muhé lo a publiká kontra di e hòmber Roseburg. E kaso a kue un buèlta ku palabranan skèrpi ekspresá di parti di e abogado di e akusado den sala di korte. E abogado klaramente a ekspresá duda den e deklarashonnan di e viktima ku segun e abogado no tin nada otro sino e intenshon pa difamá su kliente. E abogado durante tratamentu di e kaso a argumentá ku e señora Elerie lo mester tin sierto problemanan mental i òf emoshonal, komo tal ta di opinion ku no mester tuma e víktima na serio. E abogado a bai asina leu pa splika a base di ekspreshonnan ku e propio víktima a hasi pa prueba ku esaki lo tin problema ku su mes i ku no ta su kliente Roseburg ta esun kulpabel.

Klaramente den bista di e abogado e víktima ta riba e komportashon i aktitut di tuma vengansa kontra su kliente i ku en realidat tin muchu mas kos a sosodé ku no ta biniendo padilanti den sala di korte. Segun e abogado di Roseburg e víktima lo a baha di forma agresivo i violento riba su kliente Rosebeburg i ku esaki na su turno a defendé su mes.

Den bista di fiskal señora mr. Keller sinembargo ta konsiderá e akusado Roseburg komo kulpabel i asina ei a demandá un kastigu di trabou di 25 ora i tambe e fiskal ta di akuerdo ku e suma di 1000 florin pa daño i perwisio kontra di Roseburg.  Abogado di Roseburg a kalifiká e suma ku e víktima Elerie a demandá pa daño i perwisio demasiado haltu i ku no tin pruebanan valido, pa demostrá ku kumpramentu di kadena marka ‘Gartier’ a tuma lugá. E asuntu di kadena aki tambe ta un di e akusashonnan ku e víktima kontra di e akusado Roseburg. Wes señora mr. Los a keda ku aki 3 siman, esta dia 20 di yuli lo dikta sentensia.

Kaso di Rafaela, akusá di abuzo seksual di mucha menor di no a keda tratá

E siudadano di fam Rafaela, kende tin 25 aña di edat dia 23 di aprel 2023 a abuzá di un mucha menor di edat, kometiendo vários akto seksual, manera penetrashon, fulamentu di kurpa etcetera. Pa tal motibu dia 29 di yüni 2026 e mester a presentá den sala di korte, pero esei no a sosodé. Tabata abogado mr. Polsbroek ku a hiba palabra na nòmber di su kliente, elaborando riba esaki su sirkunstansia personal aktualmente.

Fiskal señora mr, Keller a presentá e denunsianan na nòmber di Ministerio Públiko kontra di Rafaela i wes señora mr. J.C.A.M. Los, finalmente a bai di akuerdo ku tratamentu di e kaso riba kontenido na un otro okashon, komo tal lo mester stipulá un otro fecha.