WILLEMSTAD— Partido MAN-PIN ta di opinion ku si Kòrsou a registrá kresementu ekonómiko di 5.1% na 2025, manera Büró di Statistik ta indiká anto esei ta nifiká ku segun e Ordenansa di AOV, ora tin un kresementu ekonómiko real mester indeksá e penshun di behes. Esaki no ta un regalo di gobièrnu, ni un fabor polítiko. Ta un obligashon i derechi ankrá den lei. Esaki ta nifiká ku AOV mester bira 1105 florin pa luna. Den e sentensia kontra SVB pa indeksá AOV, hues a bisa bon kla ku indeksashon ta un obligashon ankrá den lei.

Segun Yael Plet, na lugá di kumpli ku lei, gobièrnu a preferá sembrá duda i miedu den penshonadonan, alegando ku indeksashon lo peligrá e fondo di AOV. Frakshon MAN-PIN a desmentí e argumento aki repetidamente. E berdadero peliger pa e fondo no ta indeksashon; e peliger ta un gobièrnu ku no tin boluntat pa implementá medidanan struktural pa fortifiká e fondo.

For di 2025, Frakshon MAN-PIN a presentá diferente solushon konkreto pa oumentá entrada di gobièrnu sin pone mas preshon riba e pueblo. A indiká for di e dia ku a fòrsa e Convenant i malusá poder gubernamental na desèmber 2025, ku e manera ku gobièrnu ta pensa pa indeksá penshun pa futuro ta hasi indeksashon kasi imposibel: e penshonando su situashon lo sigui mas penoso ku e ta kaba!

Futuro di e fondo
Awor ku a pone un proposishon adishonal riba mesa, desaroyá di un manera serio i kompetitivo, esta sektor di Online Gambling, MAN-PIN ta kere ku sektor tin potensial pa generá hopi mas mion florin na entrada pa gobièrnu. Ku aktualmente no ta e kaso pa motibu di e lei di LOK ku e gobièrnu a introdusí. Frakshon di MAN den Parlamento a atvertí esaki i ta mira ku Kòrsou no ta bezig ta benefisiá di e sektor aki.

E lei di LOK mester krea entrada ku por i mester ser invertí den hendenan lokal: den salú, enseñansa, seguridat i, pa garantisá e indeksashon di AOV. Banda di esei ta krea trabou pa e pueblo ku bon salario, manera a permití. MAN-PIN no ta kansa di ripití ku solushon manera “Tourist Entrance Fee”, Impuesto riba manda sèn afó i “Sugar Tax” ta reformanan ku por ser hasi pa haña mas fondo ku lo por usa pa indeksashon di AOV i oumento den futuro.

Pobresa no ta un destino; hopi biaha ta resultado di falta di desishon polítiko den un pais den abundansia i kresementu ekonómiko .Ora gobièrnu por haña fondo pa otro prioridatnan, mester por haña fondo pa respetá e derechonan di penshonadonan. Frakshon MAN-PIN ta demostrá ku por yega na fondo. Loke falta ta boluntat polítiko. Indeksashon di AOV no por sigui ta un promesa bashí. E mester bira un realidat.