Krus Kòrá Kòrsou ku yudansa humanitario pa Venezuela

WILLEMSTAD— E temblornan, un tras di otro, ku a asotá pais bisiña Venezuela a laga e pais den un krísis humanitario sumamente serio. Hopi ta esnan ku ta preokupá pa e situashon i ke duna nan sosten. Krus Kòrá Kòrsou  den un informe ta indiká ku nan ta hasiendo e preparashon nesesario pa manda yudansa humanitario pa e damnifikadonan na Venezuela. E organisashon ta indiká ku e kantidat di mortonan ta sigui subi i a surpasá 1400, miéntras ku un kantidat mas grandi ta pèrdí.

Krus Kòrá Kòrsou ya kaba a tuma akshon i a habri e sentro na Pannekoek, Banda Bou, pa sirbi komo shelter pa biaheronan ku a keda Kòrsou na momentu ku e buelo ku nan tabata riba dje yegando Venezuela mester a desviá pa Kòrsou. Un di dos paso konkreto ta ku a aktivá e kuenta di banko MCB #2004 kaminda tur esnan ku ta sinti ku nan ke hasi un donashon spesífiko pa Venezuela por hasi esei. Tur donashon risibí ta bai pa yudansa na Venezuela.

Pa loke ta trata Kòrsou, Krus Kòrá ta hasiendo máksimo esfuerso huntu ku Krus Kòrá Internashonal pa kanalisá yudansa pa hendenan na Venezuela. Den kaso ku mester eskala e yudansa, lo atendé esei ku e diligensia nesesario. Importante pa tuma nota ku Krus Kòrá Kòrsou ta i lo kontinuá informá komunidat via di e kanalnan ofisial, kua ta e akshonnan ku ta tuma den kuadro di yudansa pa Venezuela. Pa awor tur donashon ta bon bini via di banko MCB # 2004.

Informashonnan èkstra ofisial ku ta yega na mesa di redakshon di Clarity Media ta indiká ku Guardia Nacional, lo ta blòkia yudansa pa yega na e sitionan afektá. Guardia Nacional de Venezuela ta e institushon militar respetá i nesesario ku tei pa fortalesé servisio permanente na e pueblo venesolano. Un reportahe ta indiká ku algun trùk ku artíkulonan di emergensia i tambe personal di reskate rekonosé di Nashonnan Uni, no por a pasa e barikada di militarnan venesolano.