Barku naval hulandes a bai Venezuela ku yudansa di emergensia

WILLEMSTAD— E barku Zr. Ms. Groningen a sali for di Kòrsou djadumingu mainta pa Venezuela pa entregá yudansa di emergensia despues di e temblornan devastadó  ku a asotá e pais bisiña. A karga e barku naval na Kòrsou ku suministro manera entre otro awa i artíkulonan di emergensia. Un helikòpter NH90 i dos FRISC (barku di intersepshon rápido) tambe ta na bordo.

Defensa Region di Karibe ta desplegando Zr. Ms. Groningen pa brinda asistensia despues di e temblornan devastadó. E barku ta karga un suministro di awa i por produsí awa di bebe adishonal usando su sistema di purifikashon abordo. E tripulashon di Zr. Ms. Groningen ta para kla pa duna yudansa di emergensia na e sitio, trahando estrechamente ku partnernan nashonal i internashonal. Pa medio di e akshon aki, Hulanda ta kontribuí na esfuersonan internashonal di alivio humanitario.

Banda di e despliegue di e barku di stashon, Wardakosta  di Karibe ta usando su avion Dash-8 pa yuda transportá merkansia i  personal for di e islanan Karibense pa Venezuela. Defensa Karibense tambe ta brinda sosten na e operashon di yudansa di emergensia di Merka, ku ta keda kordiná for di Hato.

Riba petishon i den kordinashon ku outoridatnan lokal di Kòrsou, Boneiru, i Aruba, Defensa Karibense ta kontribuí na operashonnan di yudansa humanitario despues di kalamidat òf emergensia den region durante henter aña dor di sostené outoridatnan lokal. Desplieguenan asina ta partikularmente importante durante temporada di orkan. Zr. Ms. Groningen ta den Karibe for di kuminsamentu di yüni i ta keda desplegá pa vários tarea di seguridat marítimo, manera vigilansia, enforsamentu di lei, i kontrarestá aktividatnan ilegal manera kontrabanda di droga.