WILLEMSTAD– Un kaso ku a hala bastante atenshon i keda komentá bastante den e komunidat di Kòrsou, ta esun di e duo Dorant i Emperador, kendenan ta akusá di ta metí den trámitenan pa un señora dominikana (ansiana) enkargá ku gulimentu di bolita pa pasa droga pa bai Europa.

E suseso trágiko akí, kaminda e señora finalmente a pèrdè su bida, ta menshoná durante e periodo 29 di desèmber 2024 pa 7 di yanüari 2025. E akusado Emperador a bin resultá enkarselá, pero outoridatnan a laga Dorant, kende tambe ta sospechá, temporalmente den libertat.

Segun informasdhonnan di Ministerio Públiko, e señora ansiana kende a pèrdè su bida ku gulimentu di bolita a keda buská na un kas situá den e bario Kirindongo Abou i transportá ku e propósito pa guli bolita i pa despues djei subié riba avion rumbo pa Europa. E señora sinembargo a bira malu debí na e gulimentu di bolita di manera ku no a lag’é subi avion. Pero finalmente a bin haña e víktima su kadaver den un mondi aya na Sabana Hundu, kaminda esnan ku a atendé kuné pa guli bolita a bai lag’é patras. Fiskal i korte a keda persistí prinsipalmente riba e akusado Emperador, kende a ninga ku e ta responsabel pa morto di e señora ansiana. En realidat ta akusá Emperador di 3 hecho kastigabel, (*) morto pa su kulpa, (*) Violashon di e lei di droga, (*) Skondementu di e kadaver.

Pero outoridatnan ta disponé di imágennan di vidio grabá kaminda ta mira Emperador (53 aña di edat) huntu ku e señora ansiana, saludano i papiando di un forma ku ta indiká ku nan kontaktonan ta bastante intensivo. Den sala di korte sinembargo Emperador a trese padilanti ku el a djis hasi un persona un fabor dor di tranportá e ansiana. Nòmber di e persona ku el a hasi e fabor, Emperador no ke menshoná, pasobra e tin masha miedu pa algu robes pasa ku su mama, kende aktualmente ta bibando su so. Ku e tipo di ekspreshonnan akí e akusado Emperador klaramente ta yama atenshon pa influensia di baho mundu.

Mas remarkabel ainda ta e forma kon wes señora mr. M.C.B. Hubben durante tratamentu di e kaso dia 19 di yüni 2026 tabata hasi preguntanan skèrpi i hopi profundo na e akusado Emperador, pa kua e akusado no tabatin kontestanan konvinsente. A bini durante tratamentu di e kaso padilanti ku Emperador mes ta un siudadano ku hopi frekuensia ta uza mariwana, pero segun Emperador esei masha dia no ta e kaso mas, ya ku den prizòn uzo di mariwana no ta posibel. E abogadonan enkargá ku e defensa di Dorant i Emperador ta mr. Ulirch Dickens i  mr. Paula Janssen. Fiskal na nòmber di Ministerio Públiko tabata señora mr Karima Hara, kende a demandá un kastigu di prizòn di 2 aña pa Dorant, siendo 8 aña di prizòn pa Emperador. Wes mr. M.C. B. Hubben a keda ku ta bai studia tur dokumento i informashon relevante di nobo pa akí 3 siman dikta sentensia.