Ranka sali ban: Di Blue Wave pa un Kòrsou ku ta floresé

Limpiesa di Korsou prioridat #1

E momento ta awor.

Si enbèrdat ke kambia i krea un mihó Kòrsou pa nos tur, no mester dal bai hasi komo sifuera tur kos mester sigui normal. Dia 25 yüni a marka fin di nos partisipashon na Mundial di Futbòl 2026. E tabata un partisipashon eksitoso. Mundu a sa na unda Kòrsou ta riba mapa. Analistanan a poné nos na puesto 48 di 48. Despues di e promé buèlta nos a laga 6 pais atras, ku 0 punto.

E impakto a bai mas leu ku futbòl. 95 minüt tabata sufisiente pa e ekipo uni nos nashon. Blue Wave a mustra nos poder ora nos ta huntu pa un solo kousa. E pregunta awor ta : Kiko awor? E ánimo no por muri. E entusiasmo no por disparse.

Gobièrnu tin e stür den man. E no mag laga e momentu aki bai pèrdí. Mester usa e energia di Blue Wave pa pone òrdu, stipulá un vishon i duna Kòrsou un direkshon. Senso 2023 a papia kaba: tráfiko, shushedat i situashonnan inaseptabel den barionan ta stroba nos. E ora a yega pa aktua.

Tráfiko: Kaba ku e ‘wild west’ riba nso kamindanan.

Nos ordenansa di tráfiko ta eksigí dim light, lus grandi i lus di brek. Pero, gobièrnu mester bin ku un ‘landsbesluit’ urgente pa regulá e lusnan. Anochi nos kamindanan a bira peligroso. Tur sorto di lus, pero sin regla di komportashon. Esei ta pone bida na peliger.

Meskos ta ku infrastruktura. Pa 7 aña gobièrnu a presupuestá 50 mion pa asfalt. Pero no tin uniformidat ni seguridat. Drèmpel di asfalt, di klenku, di kusinchi di rùber, sin señal pa yama atenshon. Kareteranan sin liña. Tuma Caracasbaaiweg komo prueba: druk, pero sin indikashon riba kaminda ku tin un òf mas di e ophetonan ei. Shofùrnan no tin un bista kla di e kaminda, pasobra nan no ta pintá. Regla, señal i kòntròl mester bini awor. Bida humano no ta pa eksperimentá kuné.

Shushedat: Dekretá emergensia pa limpia Kòrsou.

Mundu a wak nos. Nos ke mas entrada ku turismo. Pero Kòrsou ta shushi. Esaki no ta promoshon. Mester dekretá medida di emergensia: den 2 aña Kòrsou mester ta e isla mas limpi di Karibe. I no ku proyektonan di 3 luna mas.

Un plan bon kla.

Duna Selikor e mandato kompletu. Kohementu di shushi di kas, kap rama, limpia roi segun instrukshon di UOOW, kita yerba seku na kaminda i den bario, bou di guia di Aqualectra mester kap takinan ku ta drenta kabel di koriente. Sera akuerdo ku organisashonnan di bario pa mantené bario limpi.
Tur e plaka di Afvalstoffenbelasting pa Selikor. I tambe e fondo ku otro ministerionan tin presupuestá pa limpiesa, inkluyendo roi.
Hende ta esensial. Esnan ku ta kobra ònderstant tin preferensia pa haña trabou na Selikor, bou di guia profeshonal. Esaki ta baha gastu di SOAW. Te ainda limpiesa di roi ta tiramentu di plaka afó, sin ekipo ni resultado.
Proklamá e lei di plèstik awor. No mas kampaña. A papia sufisiente. Tempu pa ehekushon.
Reintrodusí kòntròl. Na aña 2010 nos a eliminá SKS ku tabata kontrolá tiramentu ilegal di shushi. Esei tabata un fayo grandi. Enkargá Project Team Handhaving ku e tarea aki.

Bèrdè públiko mester atenshon tambe. Nos a planta palma sin mantenshon. Nan a krese deskontrolá. Neem Tree ta tuma over nos naturalesa. No ta bisa pa kaba ku tur palu di Neem, pero mester di un plan. Stòp di destruí kapital. Kuminsá kòrta den e kantidat di Neem Tree di forma struktural. Stipulá un Plantsoendienst na LVV pa supervishon. Konsultá ekspertonan lokal. Planta palu manera wayaka, ku ta fuerte i mester poko mantenshon.

Pa futuro: Invershon den hende, no ku palabranan solamente.

Si nos ke gana rèspèt, anto mester invertí:

50 mion pa aña, den 10 aña = 500 mion pa edukashon i formashon. Den 10 aña nos siudadanonan mester por dominá 4 idioma atrobe. Ta baha ignoransia i bobedat.
Uza nos diaspora. Stòp di paga konsultant strañero karu ora nos tin nos mes hendenan ku kapasidat i amor pa pais.
Lotto pa Deporte awor. Stòp di papia. Deporte a karga Kòrsou riba su lomba pa añanan, apesar di falta di maneho. Dun’é e sosten struktural ku e meresé.
Statiegeld riba boter. Sr. Anthony Godett a presentá e lei. No buska ekskusa pa bisa ‘no por’. Buska manera pa bisa ‘sí por’.

E bèrdat ku no por lubidá.

Binti aña pasá señor. Jean Francisca no a keda tumá na serio. E a kere ku nos por yega Mundial. E idea a krese bira e palu ku ta duna fruta. Dia 18 novèmber 2025 el a floria. Dia 14 yüni nos a kosechá e promé fruta: nos bandera, nos himno, den un stadion yen. A grita promé komo sifuera un idea ‘loko’, pero el a demostrá: ora ku kere, nada no por stroba.

E mesun fe ei mester guia nos awor. No laga Blue Wave muri na frontera. Laga e bira nos kompas pa gobernashon hustu, pais limpi i riba e kaminda sigur.

Kòrsou a mustra mundu kiko union ta. Awor mundu mester wak kiko Kòrsou ta ora e gobièrnu traha debidamente pa su hendenan

Pa asina, manera Mr. Saab a kanta na 1983: “AI TA KEN POR KU NOS”.

Erwin Raphaëla