Konvoi ABC spesial dekorá pa honra Andruw Jones

WILLEMSTAD— Gobièrnu di Kòrsou, den kolaborashon ku Autobus Bedrijf Curaçao (ABC), a presentá un konvoi spesial na honor di ikono di béisbol di Kòrsou, Andruw Jones. Un di e konvoinan grandi di ABC a keda dekorá ku un diseño atraktivo i kolorido ku Andruw Jones komo figura prinsipal, komo un tributo na su prestashonnan ekselente den deporte i na su rekonosementu den Hall of Fame di Major League Baseball.

E presentashon ofishal a tuma lugá riba 14 di yüli na ABC i ta marka un momentu speshal pa Kòrsou. Ku e inisiativa aki, gobièrnu ta ekspresá su apresio pa un deportista ku durante su karera a pone Kòrsou riba mapa mundial.

Minister di Tráfiko, Transporte i Planifikashon Urbano (VVRP), Sr. Charles Cooper, a ekspresá su orguyo pa e rekonosementu aki. “Andruw Jones a skibi historia ku su talento, disiplina i perseveransia. El a logra un éksito grandísimo den mundu internashonal di beisbòl i, meskos, a bira un fuente di orguyo pa henter Kòrsou. Ku e bùs aki nos ta rindí un tributo na un yu di tera ku a inspirá generashonnan i ku ta sigui inspirando nos hóbennan.”

Gobièrnu ta enfatisá ku e rekonosementu di Andruw Jones ta bai muchu mas leu ku deporte. Su historia di bida ta demostrá ku soñonan por bira realidat ora talento ta kombiná ku trabou duru, dedikashon i perseveransia. Pa e motibu aki, e ta un ehèmpel importante pa hóbennan di Kòrsou ku ta persiguí nan propio meta i ambishon.