Kondena 3 aña prizon den kaso di ansiana gulidó di bolita ku a muri

WILLEMSTAD— 10 di yüli 2026 korte a dikta sentensia den e kaso trágiko di un dama dominikana ku a guli bolita i muri. Tratamentu di e kaso aki den sala di korte tabata riba e fechanan 17 di òktober 2025, 21 di yanüari 2026, 10 di aprel 2026 i finalmente 19 di yüni 2026.

Segun dokumentonan di Ministerio Públiko ta trata aki di un señora dominikano (di fam Sosa kasá ku Marti) kende riba dia 27 di desèmber 2024 a keda buská den ròlstul for di e bario Kirindongo Abou i hibá finalmente den mondi di Sabana Hundu, kaminda a bin hañé morto. E persona aki tabata gulí ku bolitanan di kokaina i tabata e intenshon pa sòru ku e ta subi avion di TUI rumbo pa Oropa, pero e esaki no a logra i finalmente esnan ku tabata atendé kuné pa e transportá droga, a disidí di lague patras na un sitio alehá den e bario Sabana Hundu. Pa ta eksakto ta asina ku e kadaver a keda hañá patras di un konteiner den e bario ya menshoná. Despues ku dia 9 di yanüari 2025 a logra identifiká e kurpa sin bida i determiná ku ta trata aki di B.M. Sosa, durante e inverstigashonnan ku a tuma lugá sospechonan tabata riba e siudadanonan di fam Dorant i Emperador.

E sospechoso Dorant a sali liber pa falta di pruebanan kontundente kontra dje, pero finalmente Emperador a bira esun ku mas a resultá komprometé ku loke a sosodé. Kontrali na Dorant ku a keda laga den libertat, Emperador sí a keda den detenshon. Emperador a keda akusá ku durante e periodo 29 di desèmber 2024 pa 7 di yanüari 2025 el a atendé ku e señora ansiana, kende tabata den un rolstul, siendo esaki tabata mal gulí ku bolita, komo tal den un situashon peligroso pa su salú.

E siguiente akusashon (nr. 2) kontra di Emperador ta di su envolvimentu den preparashon, trafikashon i entrega di kokaina.

Pero tambe e akusashon (nr. 3) ku Emperador ta envolví den skondementu di e kurpa di e víktima di fam Sosa den e bario Sabana Hundu, patras di algun konteiner.

Fiskal señora mr. K. Hara na nòmber di Ministerio Públiko a demandá un kastigu di prizòn 8 aña pa Emperador, kitando e periodo ku el a pasa kaba den aresto preventivo. Wes señora mr. M.C.B. Hubben sinembargo no a bai di akuerdo ku tur e akusashonnan lansá kontra di Emperador i asina ei a yega na e kondena di 48 luna di prizòn di kua 12 luna kondishonal. Ta nifiká ku Emperador lo mester sinta 3 aña solamente den prizòn, kitando e periodo ku el a sinta kaba.