RELATONAN DI KORTE

Korte a kastigá siudadano Simon pa kore outo burachi i dal, anto sin reibeweis

Djarason 24 di yüni tabatin tratamentu di kasonan di infrakshon kometé den tráfiko, riba kamindanan públiko. Un siudadano di fam Simon tabata entre esnan ku mester a presentá den sala di korte pa duna kuenta i rason pa violashon di reglanan di tráfiko. Simon di 59 aña di edat dia 29 di novèmber 2025 a kore outo burachi riba Kaya Nathan i dal den un muraya, tambe a resultá ku su reibeweis a kaduká. Simon a hañé den un aksidente di tráfiko ku tabatin solamente daño material komo konsekuensia. Wes mr. P.M. Leijten mesora a yama atenshon di e akusado pa splik’é ku e aksidente por tabata muchu mas grave, mirando e kantidat di alkohòl ku el a konsumí. Ku e tèst di rosea Simon a marka 815 microgram.

E akusado a presentá den sala di korte ku abogado señora mr G.C.A. Scheperboer-Parris pa hiba e defensa. E fiskal ku a hiba palabra na nòmber di Ministerio Públiko tabata señora mr. Scheer.

E akusado Simon ta un firstoffender, kende na momentu ku polis a aserk’é, a duna full koperashon. Den sala di korte Simon a deklará ku loke a pasa aki lo no sosodé mas. Fiskal a demandá un but di 2000 florin, mas un kastigu di trabou di 40 ora, mas un kurso di ‘Veilig Verkeer’ di 10 ora. A bai di akuerdo pa Simon paga e but den periodonan di 300 florin pa luna. Si Simon no kumpli ku e 50 ora di trabou en total imponé lo e kai será pa 25 dia. Tambe korte a disidí ku Simon ta pèrdè su reibeweis pa e periodo di 6 luna di kua 3 luna kondishonal, mará na un periodo di prueba di 3 aña.

Abogado mr. Bokkes a insistí pa korte tene konsiderashon ku su kliente Bregita

Un siudadano di fam Bregita (42 aña di edat) a presentá den sala di korte djarason 24 di yüni 2026, pasobra dia 14 di febrüari 2026 el a kore outo burachi na altura di rotònde Lucina E. da Costa Gomez-Mattheeuws. E tabata burachi i e tèst di rosea a duna komo resultado e skor di 805 microgram. Un konsumo di alkohòl klaramente demasiado haltu pa ta riba kaminda públiko.

Ademas Bregita tabata sin un reibeweis válido. Fiskal señora mr. Scheer a mustra ku en prinsipio ku kastigunan pa kasonan komparabel sa enserá un but di 1700 florin, pero e fiskal por lag’é te na 1500 florin ku e posibilidat pa paga den periodonan di luna. Ademas Bregita lo mester kumpli ku kurso di ‘Veilig Verkeer’ di 10 ora i huntu ku  esei lo e pèrdè su reibeweis pa 3 luna. Abogado mr. Bokkes, enkargá ku e defensa di Bregita, a mustra ku e demanda di fiskal ta demasiado haltu, pasobra su kliente a sufri bastante kaba ku tur e limitashonnan imponé riba dje. Sin e posibilidat di trafikashon riba kaya, a resultá difísil pa Bregita traha durante e periodo tras di lomba i lo e mester paga pa bolbe haña su reibeweis. Wes mr. Leijten a skucha i a yega na un kastigu di 40 ora di trabou di kua 10 ora kurso di ‘Veilig Verkeer’, mas un but di 150 florin. Si Bregita no kumpli ku e kastigu di trabou e lo mester sinta un kastigu di prizòn di 20 dia.

Un siudadano di fam Kroon a bai fiesta na Sunscape, dal beter i kousa aksidente

Un aksidente di tráfiko el a kousa riba Caracasbaaiweg – Guyabaweg dia 26 òktober 2025 despues di a sali un fiesta den Sunscape. Ta loke e siudadano di fam Kroon (65 aña di edat) a para konta den sala di korte (djarason 24 di yüni). Segun Kroon, normalmente e no sa bebe, pero e dia ei sí el a faya ku konsumo di alkohòl pa bin resultá den un aksidente den tráfiko na e krusada ariba menshoná.

E daño material a keda limitá na kurpa di e vehíkulo, pero Kroon a pasa 7 luna sin reibeweis i asina ei no por a kore outo. Fiskal a splika ku un but di 1800 florin ta usual den tipo di kasonan asina, pero ta lag’e na 1500 florin. E promilahe di alkohòl den sanger ku Kroon a skor, segun e tèst di rosea, ta 780 microgram. Finalmente fiskal a proponé un but di 1500, sino 30 dia di prizòn, mas e kurso di ‘Veilig Verkeer’ di 10 ora.

Abogado mr. Bokkes a sali fuertemente na defensa di Kroon, argumentando ku e kastigu ku fiskal mr. Scheer a demandá ta demasiado haltu, pasobra Kroon ta un mekániko ku aktualmente ta karesé di e posibilidat pa move, pasobra outoridatnan a kita e reibeweis for di dje i dor di esei pa mas di 7 luna Kroon ta pèrdiendo entrada.

Wes mr. Leijten finalmente a stipulá un but di 1000 florin, mas 10 ora di kurso ‘Veilig Verkeer’ i 5 luna sin reibeweis. Kroon en realidat tin 7 luna sin reibeweis. Si Kroon no kumpli ku pago di e but lo e kai 20 dia será.