E estado venesolano ku a sufri mas daño ta La Guaira

CARACAS, VENEZUELA— E situashon ta parse hopi serio na Venezuela despues ku dos temblor a asotá e pais. Delcy Rodriquez, den kapasidat di presidente interino di Venezuela  a bisa ku ta dos temblor di magnitut grandi a dal e pais. Huntu ku su gobièrnu nan a reuní ku e ophetivo prinsipal kual ta salba bida humano. Ta papia di 160 morto i kasi 1000 persona heridá.

Outoridatnan ta konsentrando tur esfuerso pa buska hendenan ku a keda tapá bou di edifisionan ku a basha den otro. Den e próksimo oranan ta spera ku profeshonalnan di reskate ta yega Venezuela, despues ku nan tabatin komunikashon ku e gobièrnu venesolano.

Rodriquez a gradisí e presidente merikano Donald Trump ku a keda den kontakto kontinuo ku Venezuela i a brinda apoyo. Tambe di El Salvador, Republica Dominicana, i meskos Qatar ku tambe ta bai manda reskate.

E estado ku a resultá mas afektá ta La Guiara unda un kantidat hopi grandi di edifisio a kai den otro. A dekretá La Guiara komo zona di desaster. E zona di kosta ta esun ku a haña basta danjo. Areopuerto Maiquetia di Caracas tambe a haña basta daño.

E tempu entre e dos temblornan ta net 39 sekònde. E promé tabatin un magnitut di 7.2 miéntras ku e di dos tabata ainda mas fuerte ku 7.5 riba eskala di richter. Segun ekspertonan, dos temblor tras di otro ta loke nan ta yama ‘doblete sísmiko’. Esei ta den kaso kaminda e promé temblor no a logra deskarga tur su energia i djis despues ta sigui un di dos temblor.