WILLEMSTAD – Den sala di korte a presentá djaluna 23 di mart último, e mucha hòmber di inisial C.M.B, kende na luna di òktober binidero lo kumpli 18 aña di edat. Masha remarkabel ta e hecho ku tratamentu di e kaso akí tabata programá pa kuminsá 2’or, pero ta despues di basta ratu numa e hóben akí a blo na sala di korte. Wes, fiskal i abogado mester a sinta ward’é, manera siudadanonan bon mucha.

Dokumentonan ofisial di korte ta deskribí ku e akusado C.M.B a hòrta un kantidat rèkòrt di merkansia for di Botika Santa Rosa, ku segun gerensia di e Botika a perhudiká e negoshi akí ku un suma di alrededor di 6074 florin. Esaki a tuma luga den e periodo di febrüari 2025 te sèptèmber 2025. E ladron tabata konsentrá prinsipalmente riba produktonan di kueru i kuido di e markanan Cera Ve, La Roche Posay, Loreal i Vichy. Segun kálkulo sigur 30 biaha C.M.B. a hòrta den e negoshi. E merkansianan hòrtá e tabata bende i e plakanan risibí e tabata uza pa kumpra kuminda i sali ku amigunan. Kontestando preguntanan hasí di parti di wes mr. T.E. van der Spoel, C.M.B a deklará di a akumulá un suma di plaka di entre 1000 pa 2000 florin ku su negoshi di produktonan hòrtá for di e Botika. For di e suma menshoná e akusado C.M.B a warda 800 florin, pero e sobrá el a gasta ku amigu òf kumpra kuminda kuné. No a bini un splikashon padilanti pakiko eksaktamente C.M.B tabata hòrta den e Botika i di kon por tabata posibel ku e hóben aki por a hòrta asina tantu biaha sin keda atrapá. 

Doño di e Botika a sinti e nesesidat pa hasi bastante invershon dor di instalá kámaranan den e negoshi pa por a bin detektá e ladronisia ku tabata tumando lugá. Ta di tal manera a gara C.M.B, kende a kai será pa 9 dia den G.O.G.

Rapòrtnan di sikiater, sikólogo i Reclassering a subi mesa durante tratamentu di e kaso, indikando ku C.M.B ta full responsabel pa su aktonan, pero ku lo e mester di guia pa mantené riba bon kaminda. Mas aleu a konkluí ku C.M.B a duna koperashon total na e instansianan konserní i tambe su mama a ripará ku despues di tabata será e yu akí a kambia konsiderablemente den un sentido positivo. Den sala di korte, C.M.B a ekspresá ku ta duel e masha loke el a hasi, huntu ku e doló ku el a kousa serka su famia, bisando ku nunka mas lo e kometé tipo di aktonan asina.  Abogado señora mr. Geraldine Scheperboer Parris, enkargá ku e defensa di C.M.B, a insistí ku mester duna e hóben akí e oportunidat pa demostrá su partinan bon. Na skol e ta kosechando éksito ku resultadonan ekselente, pues ku guia profeshonal e lo kontinuá sigur riba e kaminda korekto. Aktualmente C.M.B ta den su periodo promé ku èksamen. 

Fiskal señora mr. T. Keller a aksentuá ku akí ta trata di un delitu hopi serio ku mester keda kastigá, komo tal e fiskal a mantené e periodo di 9 dia ku C.M.B tabata será aya na G.O.G., komo un kastigu hubenil sufisiente. Aserka ta bini awor e demanda di un kastigu di trabou di 150 ora di kua 50 ora kondishonal, mará na un periodo di prueba di 2 aña, mas guia dor di Reclassering Hubenil. Wes a bai di akuerdo ku e demanda, pero no a disidí riba kiko lo para di e daño ku Botika Santa Rosa a sufri.