WILLEMSTAD – Den e kaso di akusado J. Henriquez, akusá di labamentu di plaka bárbaramente, wes lo dikta sentensia dia 10 di aprel binidero. For di 28 di sèptèmber 2021, hustisia ta envestigando e siudadano di fam Henriquez, kende tin 32 aña di edat, ya ku ta sospecha e di a laba plaka bestialmente. Segun Ministerio Públiko, ta trata akí di plakanan prosedente di aktonan kriminal. Pa warda e suma di 19.600 euro, 10.673 dòler merikano i 71.000 florin Antiano, Henriquez a koba un buraku den su kurá di kas, hinka e plaka den un hèmber i tapa nan bou di tera. Remarkabel ta ku na e sitio kaminda Henriquez a skonde e plaka bou di tera, el a sòru di stashoná kachónan sumamente peligroso i feros. 

Durante tratamentu di e kaso den sala di korte, djaluna 23 di mart último, Henriquez tabata masha reservá ku dunamentu di informashon. Riba kua pregunta ku wes Mr. van der Spoel a hasié, refiriendo na e plakanan ku e akusado tabatin wardá bou di tera, Henriquez tabatin un kontesta ku ta krea mas inklaridat. Por ehèmpel riba e pregunta pakiko e no ta warda plaka na banko, Henriquez a remarká mesora: “Chinesnan no ta hiba nan plaka banko, awor ta pakiko ami sí mester hasié?”. Tambe Henriquez a rekordá e echo ku Girobank a bai fayit i ku klientenan a pèrdè tur nan plaka. 

Di unda bo a sali ku tur e plakanan ei wes a puntra Henriquez, anto akí dirèkt a sigui e kontesta: “Ta resultado di trabou duru i spar hopi. Mi ta hasi negoshi den konstrukshon, agrikultura, bendementu di kuminda, kambiamentu di sèn ku turistanan, transpòrt i yuda mi tata kue djòp”.

Tabata pa motibu di denunsia ku a hasi serka outoridatnan, ku Henriquez lo mester ta disponé di arma di kandela, outoridatnan a disidí di tene redada den kas di Henriquez, kaminda lo a bin saka afó ku Henriquez tin plaka wardá bou di tera. Na momento ku Henriquez a sa ku polisnan ta su tras, Henriquez a sende su telefòn na kandela, batié kibra, kaba ‘flush’ e telefòn den wc. Wes na sierto momento durante tratamentu di e kaso a trata na rekonstruí e sirkunstansia di Henriquez sistemátikamente pa saka afó di unda Henriquez a sali ku e plakanan ku e tabatin wardá den su kurá di kas. A kuminsá establesé ku dia 1 di òktober 2019 Henriquez a bai banko i a hasi e petishon pa un fiansa, ta nifiká ku promé ku e fecha menshoná, Henriquez lo no por tabata disponé di ningun suma di plaka, sino e lo no a aserká banko. Pero, tabata riba e fecha 28 di sèptèmber 2021 ku outoridatnan a tene redada den kas di Henriquez aya na Bándariba i reis riba e plaka den forma di e sumanan di 19.600 euro, 10.673 dòler merikano i 71.000 florin Antiano. 

Tambe outoridatnan a haña den e kas, mashin pa ‘seal’ sakunan di plèstik, balansa ku sa uza pa pisa droga i armanan di kandela. Henriquez a atmití ku e sa usa e balansa pa pisa e hash ku e sa konsumí. Enfin, wes a bolbe hasi Henriquez pregunta tokante e plakanan, di unda nan por a sali, siendo den temporada di Covid kasi no tabatin trafikashon di persona riba kaya. E akusado Henriquez sinembargo a sigui insistí ku ta dor di benta di fruta, berdura i tambe kuminda i hasiendo trabounan den konstrukshon i yudando su tata ku kuementu di djòp, el a logra tur e plakanan. Wes a pidi Henriquez pa duna prueba mediante di ‘kwitantie’ (resibu), pero esei no ta posibel segun Henriquez, pasobra  e no a traha ku atministrashon. Mas aleu a bini padilanti ku a aserká tur persona i òf instansia ku Henriquez lo a hasi negoshi kuné, pero den e sentido aki tampoko no tabatin muchu resultado. Fiskal Mr. W. de Graaf a argumentá ku tin tur indikashon ku e plakanan ku Henriquez ta disponé di dje ta prosedente di krímen, pasobra Henriquez no por a presentá ningun prueba aseptabel. Ta trata akí únikamente di labamentu di plaka segun e fiskal i ademas a hañ’é ku arma di kandela pa kua el a kai será. Abogado Mr. Loth na nòmber di Henriquez a mustra ku su kliente a bende kuminda, fruta i berdura den Plasa Bieu i ku djei  tambe e lo a risibí plaka. Fiskal a para riba ku Henriquez ta kastigabel, pero komo ku e kaso akí ta for di aña 2021, fiskal ta demandá un kastigu di trabou di 150 ora i tambe ta pidi pa konfiská e sumanan di plaka ariba menshoná. Finalmente e akusado Henriquez, hibando su último palabranan promé ku sera e kaso, a deklará ku hustisia a kibra su negoshi i mata soñonan grandi ku e tabatin. Dia 10 di aprel binidero wes Mr. T.E. van der Poel lo dikta sentensia por eskrito.