WILLEMSTAD – E kantidat di arma di kandela ilegal riba kaya ta forma un problema grandi. Resientemente Ministerio Públiko a lansa e kampaña ‘Entregá bo arma i skapa un alma’. Den un informe OM ta indiká ku e kampaña ta dunando fruta. Vários hende a hasi uso di e oportunidat i entrega nan arma di kandela i alabes risibí entre 300 i 750 florin. OM a risibí 13 arma di kandela.

Segun OM, e resultadonan inisial ta mustra ku e mensahe ta yegando na komunidat i te ku awor a entregá un total di 13 arma di kandela boluntariamente. E kampaña, ku a kuminsá djaluna 16 di mart, tin komo meta pa redusí violensia ku arma i promové barionan seif i liber di arma. Durante e periodo aki, ta duna siudadanonan e oportunidat pa entregá arma di kandela i munishon ilegal sin konsekuensia penal pa poseshon. E entrega ta tuma lugá na Ministerio Públiko (De Tempel), di djaluna pa djabièrnè entre 08:00 i 15:00. Individuonan ku entregá un arma ta risibí un rekompensa monetario komo un insentivo, dependiendo di e tipo i kondishon di e arma. E montante aki ta varia entre XCG 300 i XCG 750. Ta enfatisá ku esaki no ta enserá un kompra, sino mas bien un enkurashamentu pa kontribuí na un sosiedat mas sigur.

Ta pidi siudadanonan pa presentá arma di kandela korektamente i seif paketá pa nan no por wòrdu usá mesora. Tambe ta hasi un yamada pa entrega munishon ilegal. Outoridatnan ta hasi un yamada na tur hende ku ainda ta den poseshon di un arma di kandela ilegal pa probechá di e oportunidat aki. Dor di entregá un arma, ta evitá problemanan ku e sistema di hustisia i posiblemente por salba un bida. E kampaña ta dura te ku djabièrnè 27 mart 2026