Eksperensia úniko; ku turtuganan ta nasé na Sandals Royal Curaçao

WILLEMSTAD— Bishitanan i miembronan di tim di Sandals Royal Curaçao a bira testigu di un evento natural extraordinario riba e anochi di djaluna, 24 di yüni, ora mas ku 100 turtuga chikitu a sali for di nan nèshi, riba playa di e resort i a kuminsá nan biahe pa laman.

Pa yuda e turtuganan yega na laman den seguridat, empleadonan i bishitanan a forma un kaminda den santu. Mesora a tuma kontakto ku Sea Turtle Conservation Curaçao (STCC) pa yuda i inspekshoná e nèshi pa wak si tabatin mas turtuga chikitu aden.

Durante e inspekshon, STCC a konta un total di 129 webu den e nèshi. Dies webu no tabata habrí ainda, miéntras ku a saka tres turtuga chikitu mas for di e nèshi den forma sigur. Esaki ta nifiká ku 119 turtuga chikitu a logra yega laman ku éksito, un resultado ekselente, spesialmente pa un nèshi relativamente no muchu profundo. STCC a identifiká e espesie komo turtuga “loggerhead.”

Segun STCC, esaki ta e promé nasementu di turtuga marino registrá na Kòrsou e aña aki i, te unda nan sa, tambe e promé bia ku un nasementu di turtuga ta dokumentá riba playa di Sandals Royal Curaçao. Ta sperá ku un di dos nèshi riba e mesun playa lo habri den e dos simannan benidero, ya ku turtuganan “loggerhead” hembra normalmente ta bolbe aproksimadamente dos siman despues di pone nan promé nèshi pa pone un di dos.

Sandals Royal Curaçao ta un aliado di hopi aña di Sea Turtle Conservation Curaçao pa medio di Sandals Foundation. Resientemente, na 2026, e Fundashon a kontribuí na desaroyo kontinuo di e Sentro STCC na Boka Sami, yudando ekspandé esfuersonan di konservashon i oportunidatnan edukativo tantu pa habitantenan komo bishitantenan. E resort tin komo un di su metanan pa ofresé bishitanan e oportunidat pa bishitá e sentro, pa nan por siña mas tokante turtuganan marino, konservashon di laman i kon pa interaktua ku bida marino na un manera responsabel.

“Tabata un sorpresanan inkreibel pa eksperensiá e momento spesial aki riba nos mes playa,” asina e tim di Sandals Royal Curaçao a bisa. “E posibilidat di por a kompartí e evento inusual aki ku nos bishitanan i traha huntu ku Sea Turtle Conservation Curaçao a hasi esaki un anochi inolvidabel pa tur esnan ku tabata involukrá.”