WILLEMSTAD – Wes señora mr. Bracht djabièrnè 10 aprel a disidí ku tratamentu di e kaso di e duo Dorant (49) i Emperador (52) riba kontenido lo ta 19 di yüni binidero. Aki ta trata sin duda di 3 akusashon hopi serio i lamentabel.

Pa kuminsá e duo akí ta sospechá ku durante e periodo 29 di desèmber 2024 pa 7 di yanüari 2025 nan a pasa buska e ansiano ku e fam Sosa-Marti na su kas den Kiridongo Abou, hib’e na un sitio deskonosí, siendo e señora aki tabata ‘mal gulí ku bolitanan’ di kokaina. Pero, despues ku e señora aki a bira malu i pèrdè konosementu debí na e bolitanan den su stoma, a transport’é hiba na un sitio alehá. Sin risibí e tratamentu médiko nesesario e señora ansiano aki a pèrdè su bida.

E siguiente akusashon kontra di e duo Dorant i Emperador ta violashon di e lei di droga ya ku nan ta sospechá di ta esnan ku a trata na transportá droga, kokaina, atraves di señora Sosa-Marti (entre tantu defuntu).

E di tres akusashon kontra di e duo ariba menshoná ta ku a skonde e kurpa sin bida di e señora aki na momento ku e droga a rementá den su stoma i ku tabata mustra klaramente ku e señora ta muriendo.

Den sala di korte djabièrnè último (10 di aprel 2026) tabatin solamente e akusado Emperador ku su abogado señora mr. Paula Janssen, kende a insistí ku su kliente no ta kulpabel pa morto di señora Sosa-Marti i a pidi pa laga su kliente temporalmente den libertat, pendiente di e fecha di tratamentu di e kaso riba kontenido. Segun abogado Paula Janssen, su kliente tin 9 luna será kaba, siendo ainda outoridatnan no por proba ku Emperador tin kulpa pa morto di e ansiano. Abogado mr. Paula Janssen sinembargo no por a kita for di mesa ku Emperador ta metíden transportashon di kokaina i aki wes a haña ku apsolutamente no por laga Emperador temporalmente den libertat, pasobra un desishon asina lo shòk komunidat, pues a rechasá e petishon pa skòrs e detenshon di e akusado aki. Tambe a bini padilanti ku Emperador, despues di e suseso trágiko aki, di fayesementu di señora Sosa-Marti, a hui bai Ulanda.

Remarkabel ta e echo ku e otro akusado di fam Dorant no tabata presente den sala di korte, únikamente su abogado mr. Ulrich Dickens. Finalmente wes a konkluí ku tratamentu di e kaso lo ta 19 di yüni binidero, komo tal ámbos akusado lo keda será, pendiente di e fecha programá pa tratamentu di e kaso riba kontenido.