WILLEMSTAD – Korte di hustisia den su veredikto di 10 di aprel 2026 a konkluí ku e siudadano J. Henriquez a hasi su mes kulpabel na labamentu di plaka. E kaso aki a keda tratá dia 23 di mart último i tabata 10 di aprel ku wes a presentá e kondena ku a enserá konfiskashon di tur e sumanan konserní i un kastigu di trabou di 150 ora, sino 75 dia será den prizòn. Ya for 28 di sèptèmber 2021, hustisia tabata investigando e siudadano aki di fam Henriquez, kende tin 32 aña di edat, pasobra tabata sospeché di a laba plaka bestialmente. Segun Ministerio Públiko, a trata di plakanan prosedente di aktonan kriminal. Pa warda e sumanan di 19.600 euro, 10.673 dòler merikano i 71.000 florin Antiano, Henriquez a koba buraku den su kurá di kas, hinka e plakanan den un hèmber i tapa nan bou di tera. Pues Henriquez deliberadamente a skonde e plakanan bou di tera, di un sistema kaminda el a sòru di stashoná kachónan sumamente peligroso i feros na e sitio.

Durante tratamentu di e kaso den sala di korte, djaluna 23 di mart último, Henriquez tabata sumamente reservá ku dunamentu di informashon. Riba kada pregunta ku wes mr. van der Spoel a hasi e akusado aki, refiriendo na e plakanan wardá bou di tera, Henriquez tabatin un kontesta ku ta krea mas insertidumbre i oumentá deskonfiansa den su persona. Por ehèmpel riba e pregunta pakiko e no ta warda plaka na banko, Henriquez a remarká ku énfasis: “Chinesnan no ta hiba ningun plaka banko, pues e tampoko no ta hasié.”. Tambe Henriquez a rekordá e echo ku Girobank a bai fayit i ku klientenan a pèrdè tur nan plaka.

Di unda bo a sali ku tur e plakanan ei, wes a puntra Henriquez na sierto momento, anto aki el a bini ku e kontesta: “Ta resultado di trabounan duru i ku hopi sparmentu. Mi ta hasi negoshi den konstrukshon, agrikultura, bendementu di kuminda, kambiamentu di sèn ku turistanan, transpòrt i yuda mi tata kue djòp”.

Den e veredikto ku a sirbi komo e dokumento prinsipal pa kondená Henriquez, korte a menshoná kontenido di tur e prosèsverbalnan ku outoridatnan a produsí na okashon di e redada ku a tene na su kas aya na Sabana Baca dia 28 di sèptèmber 2021, prosèsverbal di dia 29 di sèptèmber 2021, mas prosèsverbal di e fechanan 5 di òktober 2021, tambe esun di 28 di mart 2022, di 16 di aprel 2022, 27 di òktober 2021, 28 di òktober 2021 i 1 di novèmber 2021. Aki a basa tantu riba deklarashonnan di e propio akusado Henriquez komo otro testigunan, demostrando di ningun manera ku e plakanan ku el a koba hinka den tera a bini di trabounan hustu i honrado.

 Al final korte a konkluí ku e akusashonnan kontra di Henriquez di labamentu di plaka ta legalmente i konvinsentemente probá, komo tal ta rason pa konfiská e sumanan di 19.600 euro, 10.673 dòler merikano i 71.010 florin Antiano, kombiná ku un kastigu di trabou di 150 ora, sino Henriquez lo mester keda enkarselá pa 75 dia.