Un siudadano di fam Carti, kende tin 57 aña di edat tabata den sala di korte, akusá di a trata di eksportá 475 gram di kokaina. Esaki a sosodé dia 18 di febrüari 2025 ku ponementu di un pakete riba pòst, aya na ofisina di Pòst, pero ku despues a resultá ku tabatin 475 gram di kokaina den e pakete. Segun Carti su deklarashon den sala di korte, tabata un konosí di dje ku yama Pedro, kende a hasi mal uzo di su konfiansa, pasobra den Skalo nan a sinta huma mariwana, bati nan kurpa mal batí, kaba Pedro a pidié hasi un fabor di pone un pakete riba pòst. Carti a risibí e suma di 50 florin pa paga e gastunan di manera ku lo por a pone e pakete riba pòst. Despues Pedro a bah’é bèk ku outo den Skalo.

Dirèkt ora a kuminsá ku tratamentu di e kaso, Carti a referí ku durante e investigashon ku a tuma lugá, el a bai ku polisnan na un kas den Dominguitu pa mustra na unda Pedro ta biba i polisnan lo a bis’é ku Pedro ya a keda detené i transportá pa Ulanda pa un otro kaso. Fiskal señora mr. K. Hara a rechasá redondamente ku loke Carti a trese padilanti ta bèrdat. Hinter e historia ku lo tabatin un tal Pedro envolví den e asuntu akí, ta un vershon ku únikamente Carti a papia di dje. Durante tratamentu di e kaso den sala di korte, tòg fiskal a wanta un ratu pa konsultá ku outoriudatnan ku a splika i klarifiká e asuntu akí, enfatisando ku no tin ningun Pedro den e asuntu akí.

E pakete di pòst a resultá di tabatin un fondo dòbel pa skonde e kokaina. Fiskal un biaha mas a para ketu na e hecho ku kontinuamente akusadonan den kaso di transporte di droga ta trese padilanti ku ta fabor nan a hasi un otro persona i ku ta esei a hinka nan den problema ku hustisia. E argumento ei, den bista di fiskal ta unu ku no ta sirbi ningun propósito.

Hecho ta ku e akusado Carti ta un firstoffender, anto den su kaso e droga no tabata zuiver, di manera ku ta pa e kantidat di 40% so e ta responsabel. E kastigu a bira 6 luna di prizon di kua 3 luna kondishonal i un periodo di prueba di 3 aña. Abogado señor mr. A.K.H Ayubi a pidi pa tene konsiderashon ku e sirkunstansia personal di su kliente, kende ta un firstoffender. Carti sinembargo a sigui bisa ku e ta hopi rabiá riba Pedro ku a hasi mal uzo di su konfiansa. Wes mr. J. van der Groen a bisa finalmente ku e mester laga para un banda si den e kaso akí tabata eksistí un Pedro sí òf nò, pasobra esei di ningun manera no a keda probá. Carti komo tal pronto lo mester bai sinta su kastigu full den prizon, pasobra e no a pasa ni sikiera un periodo den aresto preventivo.