St.Maarten ta prepará awor ku Kòrsou a bisa di ke bula afó di e union monetario

PHILIPSBURG – Gobièrnu di St.Maarten a tuma desishon ku ta lanta un “task force” ku mester bai evaluá e union monetario entre Kòrsou i St.Maarten. Marinka Gumbs, minister di finansa di St.Maarten a bai su Parlamento. Na opinion di minister Gumbs, tin mester di dos hende pa baila tango, pero despues di 15 aña di un matrimonio pa kumbinensia, anto tin algun hende ku lo bisa asta ku ta di inkonbeniensia, ta parse ku un partner ta bailando e rumba di Sint Maarten miéntras ku e otro ta baila tumba. St.Maarten ta prepará, asina e minister a deklará.

Den e reunion di Komishon Sentral a trata e futuro di e union monetario entre Kòrsou i Sint Maarten i e papel i funshonamentu di e Banko Sentral di Kòrsou i Sint Maarten(CBCS). Minister Gumbs a mustra ku e tópiko aki ta trata un asuntu ku ta toka e núkleo di stabilidat ekonómiko i finansiero di St.Maarten, ku ta e  situashon aktual na CBCS, e tenshonnan den e union monetario, i e konsekuensianan di e intenshon deklará di parti di Kòrsou pa sali for di dje.

Gobièrnu di St. Maarten ta tuma akshon desisivo. Konseho di Minister ta prepará pa establesé un grupo di trabou riba e futuro monetario i stabilidat finansiero, ku ta enkargá pa kordiná ku partidonan interesá manera e IMF i CBCS, evaluá e union, evaluá e implikashonnan di un posibel disolushon, studia opshonnan di moneda, desaroyá senario pa un banko sentral nashonal, analisá e efektonan riba bankonan i sistema di pago, i hasi rekomendashonnan.

E enfoke di gobièrnu di St.Maarten ta guiá pa sinku prinsipio sentral: stabilidat promé, kualke desmantelamentu nunka mester pone stabilidat finansiero na peliger; transparensia i responsabilidat di parti di CBCS i su socionan; asosiashon riba base di igualdat. St.Maarten lo no lo aseptá ningun ròl supordiná; protekshon di e interesnan di Sint Maarten, su pueblo i su ekonomia; i preparashon. Nos lo sigui dilanti ku garantia di depósito te na 50.000 florin i sistemanan básiko di pago.

Bo no por simplemente bai for di un banko sentral konhunto despues di 15 aña. Si e union terminá, mester negoshá aktivonan, riesgonan, obligashonnan, i protehá depósitonan i konfiansa. E estatuto no ta mara Kòrsou i Sint Maarten pa semper. Nos a drenta den dje ku wowo habri. Mester deliberá riba un posibel desmantelamentu, strukturá legalmente, i finansieramente hustu. St.Maarten lo ta kla pa kualke resultado.

St. Maarten a enfrentá atversidatnan manera horkannan i krísis institushonal anteriormente i a sali mas fuerte for di nan. E momento aki ta eksihí unidat, determinashon i klaridat. Lo no laga nan mete preshon riba nos, pone nos na banda, ni intimidá nos. Gobièrnu lo protehá e stabilidat finansiero i sigurá ku e futuro di Sint Maarten ta sigur, stabil i próspero.