Tratamentu di e kaso di eksportashon di 1545 gram di kokaina  den sala di korte a kuminsá ku hopi beheit, kousá pa e akusado femenino di fam Pieter, kende a ninga kategórikamente ku e tin algu di haber ku e droga konfiská den un pakete. E akusado akí tin 28 aña di edat, kende segun e informashon ku a bini padilanti di parti di Ministerio Públiko, riba dia 27 di sèptèmber 2024, lo mester a hiba un pakete pa pone riba pòst ku a kontené 1545 gram di kokaina.  Remarkabel ta e hecho ku no tabatin kámara instalá na e sitio kaminda e pakete a keda entregá, anto tampoko no a saka pòtrèt di esun ku a trese e pakete. E pakete tabata destiná pa Ulanda, pa ta eksakto pa Rotterdam.

Outoridatnan lógikamente a bin konsentrá full riba e medio di identifikashon ku a hasi uzo di dje, den e kaso akí e sedula. Pero e akusado Pieter a ninga ku ta trata akí di su sedula. Wes a hasi pregunta tokante e adrès kaminda e señora ta biba aktualmente, anto tambe kaminda el a biba den pasado. E akusado a sigui para ariba ku un hende lo a uza su sedula i ku no ta e a pòst ningun pakete. Wes e ora ei a puntra e akusado Pieter si el a pèrdè su sedula den pasado i si el a hasi denunsia ku el a pèrdè e sedula. Finalmente a bin hasi un komparashon ku e sedula aktual di e señora i esun ku a uza na e instansia kaminda a entregá e pakete ku e droga. Ta e mesun sedula, mesun firma tin riba dje i ta e mesun number di sedula!!

Mas pregunta wes i fiskal hasi na e akusado akí, mas a kuminsá parse ku ta e señora akí mes lo a pone e pakete riba pòst. A yega un momento ku e akusado a kai den asina tantu pèrtá, ku e no por a kontestáningun pregunta mas. Fiskal a kuminsá konkluí ku e deklarashonnan di e señora ta mentiroso i ku e kulpa klaramente ta serka dje. Komo ku ta 40% so ta e kantidat di droga real, e kastigu di prizon lo bira 18 luna di kua 9 kondishonal. Tin tur indikashon ku e señora akí lo kai den un problema serio, pasobra e yunan lo keda sin nan mama ku lo kai será pa un periodo bastante largu. Fiskal ya ta sakando e konklushon ku e aktitut i proseder di e akusado akí ta unu sumamente negativo ku ta hustifiká demanda di un kastigu severo.

Abogado señora mr. M.J. Eisden, mirando ku su kliente ta mal pegá i ku e akusado akí sigur lo bai sali malísimo for di e problema akí, a pidi wes pa wanta un ratu ku tratamentu di e kaso pa e por kòmbersá apart ku su kliente. Wes a bai di akuerdo di manera ku e akusado Pieter i su abogado por a bandoná sala pa un ratu. Ya for di kuminsamentu a bini padilanti ku e akusado akí tin e yu mas grandi ta bai skol i huntu ku esei tambe yunan chikitu ku mester di guia full i atenshon di nan mama. Hasta ta trata akí di un yu ku a kaba di nase i ku tin apénas 3 luna. Ta un señora ku ta trahando duru, pero ku ta konfrontando ku problemanan finansiero serio.

Regresando den sala bèk, e akusado Pieter a bin rekonosé ku ta e mes a hiba e pakete ku droga pa pòst i ku esun ku a dun’é e enkargo a duna e suma di 3000 florin komo rekompensa. Fiskal, despues ku e akusado a kaba di hiba palabra, mesora a bai di akuerdo pa moderá e demanda di kastigu na 12 luna kastigu di prizon di kua 6 luna kondishonal. Wes mr. J. van der Groen a baha e kastigu ainda mas, esta na 12 luna di kua 8 luna kondishonal. Ta nifiká ku e akusado Pieter lo sinta un kastigu di prizon un poko suavisá.