Parlamentarionan St.Maarten ta atvertí pa e isla no pèrdè den posibel kiebro union monetario

PHILIPSBURG – Miéntras e diskushonnan ta bai i bini relashoná ku e union monetario entre Kòrsou i St.Maarten, den e Banko Sentral kompartí, na Isla Riba parlamentarionan ta kuestioná nan minister di finansa Marinka Gumbs. Tin parlamentario ku ya kaba a kuminsá puntra kon ta para ku e debakel di Ennia den kua St.Maarten tambe mester hinka plaka pa e próksimo 30 aña. Otronan ta pone énfasis ku Mullet Bay ta di St.Maarten anto esei mester keda asina i no por bai den repartishon si akaso e union den e banko sentral mester kibra. Pues un alerta a bai na direkshon di gobièrnu di e isla pa St.Maarten no pèrdè den posibel kiebro di e union monetario.

Miembro di Parlamento Kotai a bisa ku Banko Sentral (CBCS) a hasi gastu di mas o ménos 15 mion florin pa e transishon di florin karibense. CBCS a komprometé su mes pa sigui aseptá e biyetenan di Antia pa 30 aña, kon lo kumpli ku esaki si disolvé e union? Pa loke ta trata ENNIA , tin un plan kaminda St. Maarten lo kontribuí ku 2.3 mion florin pa aña kuminsando na 2027, miéntras ku Kòrsou ta kontribuí un parti mas grandi. Si e papel di CBCS ta kambia, ken lo asumí e responsabilidat? Ken lo sigui ku e proseso di rekuperashon i sigui persiguí e direktornan anterior?

Parlamentario La Croes a enfatisá ku e ta para huntu ku St. Maarten, i kualke persona ku ta pará ku St. Maarten, e ta para huntu ku nan. E promé minister a bisa ku Mullet Bay ta na St. Maarten i lo keda na St. Maarten, wèl mester sigurá ku Mullet Bay ta keda pa St. Maarten.

Parlamentario Doran a bisa ku e no ta kòrda ku den e dos añanan ku a pasa ku gobièrnu a yega na keho tokante e banko sentral. Tur kos tabata andando bon. ‘E úniko kos ku tabata na nos desbentaha tabata ku nos no a nombra miembronan permanente di e hunta di komisario, esaki tabata un problema ku nos mes a krea i nos mes a kousa. Minister, abo a menshoná ku Kòrsou ke poder. Nos mes ta kontribuí na duna Kòrsou e poder ei dor di no nombra nos miembronan di komisario. Mi a tende menshoná ku Mullet Bay ta parti di e banko sentral, segun mi, Mullet Bay ta kai bou di e holding di ENNIA i no ta parti di e banko sentral, sino ta bou di su supervishon.

Ora mi ta papia ku Kòrsou, nan no ta bisa tur e kosnan aki. Mi no ta sinti e mesun energia aya na Kòrsou. 

Parlamentario Irion ta kere ku si e minister Gumbs a nombra e presidente ku e tabata ke, St.Maarten lo no tabata diskutiendo pa sali for di e union monetario. Tur kos tabata bon te e úniko punto ei.  Parlamentario Ottley a duna di konosé ku e ta un polítiko i ta kòrda ku ora el a vota kontra ENNIA, el a bisa ku e banko sentral no tabatin ningun rekurso, nan a sali limpi i St.Maarten a karga ku e peso. A sobreviví un par di aña mas; Kòrsou tabata den gran nesesidat i Hulanda a forsa St.Maarten pa salba Kòrsou.

Minister Gumbs a bisa ku e no sa kua parti di su presentashon a duna e impreshon ku e ke desmantelá e union. ‘Mi a defendé e florin karibense tur kaminda. E papiamentu tokante desmantelashon no a sali for di e minister aki. Mi a bai Kòrsou i tabata un diskushon kompletamente diferente. Mi ta preparando St.Maarten den kaso ku algun parti ke sali for di e union monetario.